ფოტოები ფეხბურთის ლეგენდის, პელეს დაკრძალვიდან - ოჯახმა სანტოსს სთხოვა, 10 ნომერი, რომლითაც პელე თამაშობდა, აღარ გადასცენ სხვა ფეხბურთელს

ათიათასობით ბრაზილიელი გამოვიდა სან-პაულუს ადმინისტრაციული რეგიონის ქალაქ სანტოსის ქუჩებში, რათა დამშვიდობებოდა ბრაზილიური ფეხბურთის ლეგენდას, პელეს.

თავად პელეს სურდა დაკრძალვა ამ ქალაქში, პატარა კერძო სასაფლაოზე, საიდანაც სანტოსის სტადიონი ჩანს. დაკრძალვა ფეხბურთელის სურვილის შესაბამისად გაიმართა.
პელეს დამშვიდობება სანტოსის სტადიონზე ორი დღის განმავლობაში მიმდინარეობდა, ამ დროის განმავლობაში სტადიონზე 150 ათასზე მეტი ადამიანი მივიდა.
პელეს დაემშვიდობა ქვეყნის ახლად არჩეული პრეზიდენტი, ლულა და სილვაც, რომელიც მას კარგად იცნობდა.

„და მისი დიდების მომენტებში, როდესაც ის შეხვდა ინგლისის დედოფალს და როდესაც მან მიიღო ჯილდოები, პელე ისეთივე ბიჭი იყო, როგორიც ინტერვიუებს აძლევდა ან ბავშვებთან საუბრობდა", - თქვა პრეზიდენტმა და გაიხსენა შესანიშნავი მოთამაშე.

ლულა და სილვა სტადიონზე მეუღლესთან, ბრაზილიის პირველ ლედისთან, როსანგელა და სილვასთან ერთად მივიდა. სახელმწიფოს მეთაურის ჩამოსვლის შემდეგ სტადიონზე მემორიალი გაიმართა.

კუბო ცხედრით სანტოსის ქუჩებში გადაიტანეს, შემდეგ კი სასაფლაოზე.

მსვლელობამ, რომელიც გარდაცვლილის თხოვნით ძალიან მოკრძალებული იყო, ქალაქის ქუჩებში გაიარა პელეს სახლთან, სადაც ახლა ცხოვრობს მისი დედა, სელესტე არენტესი, რომელიც 100 წლისაა.
პელე 2022 წლის 29 დეკემბერს, 82 წლისა, ხანგრძლივი ავადმყოფობის შემდეგ გარდაიცვალა. ბოლო წლებში ის კიბოს მკურნალობას გადიოდა.

პელეს ოჯახმა სანტოსს სთხოვა, მისთვის სამუდამოდ მიენიჭებინა 10 ნომერი, რომლითაც დიდი ფეხბურთელი თამაშობდა ამ კლუბში და აღარ გადაეცა სხვა ფეხბურთელებისთვის. კლუბი ამ მოთხოვნას განიხილავს.