„ყველას გვიყვარხარ, მიშო... გულს გაგიბზარავს იმაზე ფიქრი, თუ რას ხედავდა და გრძნობდა ჩემი ღიმილიანი და თავაზიანი მიშო - კოლეგები დაღუპულ ოპერატორზე

სოფელ ასურეთის მიმდებარედ, საჰაერო ბურთის ჩამოვარდნისას დაღუპულებს შორის ერთ-ერთი ტელეკომპანია „იმედის“ ოპერატორი მიშო ბიძინაშვილია.

მიშოს გარდაცვალებას სოციალურ ქსელში კოლეგები ემოციური ტექსტებით ეხმაურებიან:

„მიშო…თბილი, ტკბილი, ღიმილიანი, ყურადღებიანი, წესრიგა და ძაალიან საყვარელი ბიჭი დავკარგეთ იმედელებმა…. ყველას გვიყვარხარ, მიშო”, – წერს ეკა ფანგანი.

პოსტს აქვეყნებს ჟურნალისტი თათია ზუხბაია:

„მიწაში ჩაფლულებზე…
ემიგრანტი დედის გულზე აღარ მინდა ფიქრი, იმ საშინელმა სიკვდილის ჩიტებმა, შვილები რომ გამოგლიჯეს, ერთი კი არა, სამივე…

მერე ამასაც არ დასჯერდნენ, მიწიდან ცაში აიჭრნენ, მრავალგზის გამოცდილ, მფრინავებზე, სწრაფები და მოქნილები… ისევ ის საშინელი ჩიტები გამოდგნენ...

გულს გაგიბზარავს იმაზე ფიქრი, თუ რას ხედავდა და რას შეიძლება გრძნობდა , ჩემი კოლეგა, ღიმილიანი და თავაზიანი მიშო. ან რა კადრები ინახება, იმ კამერაში, რომელმაც მასთან ერთად იფრინა, და რომელსაც ბოლომდე პროფესიულად უერთგულა.

ვინ რა იცის, ქვემოთ მომლოდინე იმ ჟურნალისტის გულში რა ხდება, წამებში წლების მეგობარი რომ გაუფრინდა…
ან ის მძღოლი რას ფიქრობს, მივლინებიდან ერთით ნაკლები ადამიანით, რომ დაბრუნდა. რა საზარელი დღეა”, – წერს თათია ზუხბაია.

ცნობისთვის, საჰაერო ბურთი ფოთის ცენტრალური სტადიონიდან დღეს დილით აფრინდა. ორ მფრინავს საჰაერო ბურთით ყველაზე დიდ მანძილზე გაფრენაში მსოფლიო რეკორდის დამყარებამდე საცდელი ფრენა უნდა განეხორციელებინათ. საფრენი აპარატით ისინი ფოთიდან კახეთის მიმართულებით მიფრინავდნენ.

წინასწარი ინფორმაციით, საჰაერო ბურთი ელექტროგადამცემ ბოძს შეეჯახა, რამაც კატასტროფა გამოიწვია. საჰაერო ბურთზე მყოფი სამივე ადამიანი დაიღუპა.

მომხდარზე გამოძიება სისხლის სამართლის კოდექსის 275-ე მუხლით დაიწყო, რაც რკინიგზის, წყლის, საჰაერო ან საბაგირო ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს.

„პრაიმტაიმი“ მწუხარებას გამოთქვამს მომხდარი ტრაგედიის გამო. ვუსამძიმრებთ დაღუპულთა ოჯახებს და კოლეგებს.

ასევე ნახეთ:

„ვერასდროს დავიჯერებ ამ ამბავს! ყველაზე კეთილი მიშიკო!“ - ტრაგიკულად დაღუპულ ოპერატორს მეგობრები ემშვიდობებიან

„დიდი შანსია, რომ თქვენს მომავალ რჩეულს სწორედ ამ წრეში შეხვდეთ...“ - ვის უმზადებს სიურპრიზებს ახალი მთვარე

გაითვალისწინე ეს წესები, რომ 9 თებერვალს თქვენს ცხოვრებაში ბედნიერება და წარმატება შემოვიდეს