ამ წუთებში ვარკეთილში სპეცოპერაცია მიმდინარეობს - რა ულტიმატუმს უყენებს ძებნილი პოლიციას

სპეცოპერაცია მიმდინარეობს ამ წუთებში ვარკეთილში. კრიმინალური პოლიცია და საპატრულო ეკიპაჟები  შუამთის ქუჩაზე არიან მობილიზებული.

„პრაიმტაიმის“ინფორმაციით, ბინაში ორი ძებნილი პირი იმყოფება, რომელთაგან ერთ-ერთი, ბ.შ კარის გაღების შემთხვევაში თავის აფეთქებით იმუქრება.

ორკვირიანი ძებნის შემდეგ სამართალდამცველებმა ახალგაზრდებს მიაკვლიეს და ამ დროისთვის მათ დასაკავებლად სპეციალურ ოპერაციას ატარებენ. 

ცნობისთვის, 15 აპრილს, თბილისი-სენაკი-ლესელიძის ავტომაგისტრალის 39-ე კილომეტრზე, „ტოიოტას“ მარკის ავტომობილის მძღოლი განზრახ შეეჯახა პოლიციელის ავტომანქანას და შემთხვევის ადგილიდან თანმხლებ პირებთან ერთად მიიმალა. ავტოსაგზაო შემთხვევის შედეგად, საპატრულო პოლიციის დეპარტამენტის მცხეთა-მთიანეთის მთავარი სამმართველოს სახაზო სამმართველოს უფროსმა - დავით მიქიაშვილმა ჯანმრთელობის დაზიანება მიიღო.

მომხდართან დაკავშირებით სამართალდამცველებმა, მოსამართლის განჩინების საფუძველზე, 1988 წელს დაბადებული მ.ხ. ზუგდიდში დააკავეს. გამოძიებით ასევე დადგინდა, რომ ბრალდებული მ.ხ. მძღოლის ერთ-ერთი თანმხლები პირია, რომელმაც მომხდარი ავტოსაგზაო შემთხვევის შესახებ პოლიციას არ შეატყობინა და სხვა პირებთან ერთად მიიმალა, ხოლო ორი თანმხლები პირი ამ დრომდე იძებნებოდა.