მსოფლიო • 1788186665

ჩვენ მზად ვართ, ერთად ვიმუშაოთ უვიზო რეჟიმის მუდმივობისთვის, თუ ჩინური მხარე ამას შესაძლებლად და სასარგებლოდ ჩათვლის - ვლადიმერ პუტინი

ჩვენ მზად ვართ, ერთად ვიმუშაოთ უვიზო რეჟიმის მუდმივობისთვის, თუ ჩინური მხარე ამას შესაძლებლად და სასარგებლოდ ჩათვლის, – ამის შესახებ რუსეთის პრეზიდენტმა, ვლადიმერ პუტინმა, ჩინეთის პრეზიდენტთან, სი ძინპინთან შეხვედრის დროს განაცხადა.ვლადიმერ პუტინმა სი ძინპინთან მოლაპარაკებები „შანხაის თანამშრომლობის ორგანიზაციის სამიტის ფარგლებში“ გამართა და რუსეთ-ჩინეთის პარტნიორობას სახელმწიფოთაშორისი ურთიერთობების მოდელი უწოდა.„თანამშრომლობა წარმატებით ვითარდება ყველა სფეროში, მათ შორის ეკონომიკაში. ჩვენ ვახორციელებთ მსხვილ პროექტებს ენერგეტიკის, მრეწველობის, კოსმოსის, ტრანსპორტისა და ლოჯისტიკის სფეროებში. ციფრული ინოვაციები, მათ შორის ხელოვნური ინტელექტის ტექნოლოგიები, თანამშრომლობის ახალ შესაძლებლობებს ქმნის“, – აღნიშნა ვლადიმერ პუტინმა.რუსეთის პრეზიდენტის თქმით, უვიზო რეჟიმის წყალობით, ორ ქვეყანას შორის ტურისტული ნაკადი წლის პირველ ნახევარში 43 პროცენტით გაიზარდა.გასული წლის სექტემბერში ჩინეთმა რუსებისთვის 12 თვის ვადით 30-დღიანი უვიზო რეჟიმი შემოიღო, რაზეც რუსეთმა დეკემბერში ანალოგიურად უპასუხა. მაისში პეკინმა ის 2027 წლის 31 დეკემბრამდე გაახანგრძლივა, ხოლო პუტინმა ივლისში მსგავს ბრძანებულებას მოაწერა ხელი.თავის მხრივ, ჩინეთის პრეზიდენტმა განაცხადა, რომ ჩინეთი მზადაა ითანამშრომლოს რუსეთთან და სხვა მხარეებთან, რათა გააძლიეროს გლობალური მმართველობის რეფორმისა და თანასწორი და მოწესრიგებული მრავალპოლარული სამყაროს წინსვლის მამოძრავებელი ძალა.სი ძინპინმა ასევე აღნიშნა, რომ პეკინი მზადაა ითანამშრომლოს მოსკოვთან და სხვადასხვა მხარესთან, რათა ერთობლივად განსაზღვრონ „შანხაის თანამშრომლობის ორგანიზაციის“ განვითარების კურსი და უზრუნველყონ მისი სტაბილური და მდგრადი პროგრესი.

მსოფლიო • 1787895273

დონალდ ტრამპი: ვლადიმერ პუტინი არ აპირებს ნატოს ტერიტორიაზე თავდასხმას

 ვლადიმერ პუტინი არ აპირებს ნატოს ტერიტორიაზე თავდასხმას, - განაცხადა თეთრი სახლის ლიდერმა ჟურნალისტებთან.მანამდე დონალდ ტრამპმა გამოცემა „აქსიოსთან“ ინტერვიუში განაცხადა, რომ ნატოს ქვეყნებზე რუსეთის შესაძლო თავდასხმა არ აღელვებს.„მე მასთან კარგი საუბრები მქონდა და ის ნატო-ს ტერიტორიაზე თავდასხმას არ აპირებს. ამაზე კომენტარის გაკეთება არ მსურს, მაგრამ ისინი თავს არ დაესხმებიან“, - აღნიშნა ტრამპმა.

მსოფლიო • 1787773751

„ბლუმბერგი“ – რუსეთი აპირებს, გაზარდოს უკრაინაზე ბალისტიკური რაკეტებით მასირებული დარტყმების ინტენსივობა, მას შემდეგ, რაც სამშვიდობო მოლაპარაკებები, ფაქტობრივად, ჩიხში შევიდა

რუსეთი აპირებს, გაზარდოს ბალისტიკური რაკეტებით მასირებული დარტყმების ინტენსივობა უკრაინაზე, მას შემდეგ, რაც სამშვიდობო მოლაპარაკებები ფაქტობრივად ჩიხში შევიდა. ამის შესახებ „ბლუმბერგი“ კრემლთან დაახლოებულ წყაროებზე დაყრდნობით წერს.გამოცემის ცნობით, მოსკოვი განიხილავს კიევის, კერძოდ, დედაქალაქის ცენტრის და სხვა უკრაინული ქალაქების ინფრასტრუქტურული ობიექტების დაბომბვის გაძლიერების შესაძლებლობას.წყაროების თქმით, მოლაპარაკებების მცდელობები პრაქტიკულად ჩავარდა და მხარეები საწყის წერტილს დაუბრუნდნენ. მათივე განცხადებით, რუსეთის პრეზიდენტი ვლადიმერ პუტინი ომს არ შეწყვეტს არც სანქციების ეკონომიკური ზეწოლის და არც რუსეთის ნავთობის გადამმუშავებელ ქარხნებსა და ლოგისტიკურ ქსელებზე უკრაინის იერიშების ზეგავლენით.„ბლუმბერგის“ წყაროების თანახმად, მოსკოვი უკრაინის თავდასხმებს ნატო-ს ქვეყნების მხრიდან განხორციელებულ იერიშებად აღიქვამს, ვინაიდან ალიანსის წევრები კიევს იარაღითა და სადაზვერვო ინფორმაციით ამარაგებენ. მათივე თქმით, საბრძოლო მოქმედებების ამჟამინდელი ფაზა სამხედრო ესკალაციის პიკი არ არის.კრემლთან დაახლოებული პირების ინფორმაციით, დიპლომატიური ძალისხმევის არარსებობის პირობებში, მოსკოვს სამხედრო მიზნების მისაღწევად კონფლიქტის შემდგომი ესკალაციის გარდა დიდი ალტერნატივა არ რჩება.რუსეთი იმედოვნებს, რომ აშშ-ის პრეზიდენტის წარმომადგენლები – ჯარედ კუშნერი და სტივ უიტკოფი მოსკოვს ახალი წინადადებებით ეწვევიან, თუმცა, წყაროების თქმით, მოლაპარაკებებში პროგრესის მოლოდინი დაბალია.გამოცემის ინფორმაციით, სულ უფრო მეტი რუსი მაღალჩინოსანი მიდის დასკვნამდე, რომ, საბოლოო ჯამში, შესაძლოა, პუტინმა  უკრაინაში ტაქტიკური ბირთვული იარაღის გამოყენების გადაწყვეტილება მიიღოს, როგორც უკიდურესი ზომა.გამოცემა განმარტავს, რომ ამჟამად არანაირი ნიშანი არ არსებობს იმისა, რომ რუსეთი უკრაინაში ბირთვული იარაღის გამოყენებისთვის ემზადება.

მსოფლიო • 1787338450

სერბეთმა ტყის ხანძრების გამო დახმარებისთვის ევროკავშირსა და რუსეთს მიმართა

სერბეთმა ტყის ხანძართან გასამკლავებლად დახმარება, როგორც ევროკავშირს, ისე რუსეთს სთხოვა. ამის შესახებ „როიტერი“ წერს.ქვეყნის  შინაგან საქმეთა სამინისტროს საგანგებო სიტუაციების დეპარტამენტის უფროსმა, ლუკა ჩაუშიჩმა განაცხადა, რომ სერბეთმა ევროკავშირის დახმარების სისტემას სახანძრო თვითმფრინავები და სპეციალიზებული ტექნიკა სთხოვა.„გვჭირდება 10 ტონაზე მეტი ტვირთის ტარების უნარის მქონე თვითმფრინავები და ხუთი ვერტმფრენი, რომელთაც ოთხ ტონაზე მეტი წყლის გადატანა შეუძლიათ. უნდა აღვნიშნო, რომ საკუთარი მძიმე ვერტმფრენებიც გვაქვს, თუმცა ევროკავშირის სამოქალაქო დაცვის მექანიზმისგანაც ვითხოვეთ დახმარება. ასევე მოვითხოვეთ 10 სპეციალიზებული მანქანა, რომლებსაც ქვიშნარ ტერიტორიაზე მუშაობა შეუძლია“, – აღნიშნა ჩაუშიჩმა.სერბეთი ევროკავშირის წევრი არ არის, თუმცა ბლოკის სამოქალაქო დაცვის მექანიზმის ფარგლებში საგანგებო დახმარებაზე წვდომა აქვს.მიმდინარე ზაფხულს ბელგრადმა ესპანეთს ტყის ხანძრებთან ბრძოლაში დასახმარებლად სახანძრო ვერტმფრენი და საგანგებო რეაგირების ჯგუფი აღნიშნული მექანიზმის ფარგლებში გაუგზავნა, თუმცა, როგორც „როიტერი“ წერს, ევროპის მასშტაბით მძვინვარე ხანძრებმა ევროკავშირის რესურსები მნიშვნელოვნად ამოწურა.ამასთან, როგორც გამოცემა აღნიშნავს, მიმდინარე კვირის დასაწყისში რუსეთმა სერბეთს ხანძართან საბრძოლველად თვითმფრინავი გაუგზავნა. სერბული მედიის ინფორმაციით, თვითმფრინავი ვლადიმერ პუტინის ბრძანებით გაიგზავნა, მას შემდეგ, რაც სერბეთმა დახმარება ითხოვა.

მსოფლიო • 1786609969

პუტინი: რუს ხალხს გამარჯვებულთა გენეტიკური კოდი აქვს

რუსეთის პრეზიდენტი ვლადიმერ პუტინი აცხადებს, რომ „რუს ხალხს გამარჯვებულთა გენეტიკური კოდი აქვს“. ამის შესახებ პუტინმა კურილის კუნძულ იტურუპზე ვიზიტისას განაცხადა.კუნძულ იტურუპზე ​ვლადიმერ პუტინმა დაათვალიერა თევზის გადამამუშავებელი საწარმო „იასნი“, რაიონული საავადმყოფო და სკოლა, ასევე შეხვდა სახალინის ოლქის გუბერნატორს, ვალერი ლიმარენკოს.გუბერნატორმა რუსეთის პრეზიდენტს სპეცოპერაციის მონაწილეთა და მათი ოჯახის წევრების მხარდაჭერისთვის განხორციელებული ღონისძიებების შესახებ მიაწოდა ინფორმაცია.ლიმარენკოს განცხადებით, როცა ხალხს ხვდება, ხედავს მათ განწყობას. მისი თქმით, ხალხი მზად არის, ყველაფერი გააკეთოს გამარჯვების მისაღწევად.„ასეთია ჩვენი ხალხი. გამარჯვებულთა გენეტიკური კოდი აქვთ“, – უპასუხა პუტინმა.ცნობისთვის, საბჭოთა კავშირმა კურილის კუნძულები მეორე მსოფლიო ომის მიწურულს, 1945 წელს დაიკავა. იაპონია არქიპელაგის სამხრეთით მდებარე ოთხ კუნძულს – იტურუპს, კუნაშირს, შიკოტანსა და ჰაბომაის თავის ისტორიულ ტერიტორიად მიიჩნევს.

მსოფლიო • 1786603610

პუტინი კურილის კუნძულ იტურუპზე ჩავიდა, იაპონია ვიზიტს გმობს და აცხადებს, რომ კუნძული იაპონიის განუყოფელი ტერიტორიაა

რუსეთის პრეზიდენტი ვლადიმერ პუტინი კურილის კუნძულ იტურუპზე ჩავიდა. კრემლის ცნობით, ეს პუტინის პირველი ვიზიტია კურილის კუნძულებზე.რუსეთის ლიდერმა მოინახულა თევზის გადამამუშავებელი საწარმო „იასნი“, რაიონული საავადმყოფო და სკოლა, ასევე შეხვდა სახალინის ოლქის გუბერნატორს.იაპონური მედიის ცნობით, იაპონიის საგარეო საქმეთა მინისტრი ტოშიმიცუ მოტეგი აცხადებს, რომ ტოკიო ვიზიტს „მკაცრად აპროტესტებს“ და აღნიშნავს, რომ „ჩრდილოეთის ოთხი ტერიტორია, მათ შორის ეტოროფუს კუნძული (რუსულად იტურუპი), როგორც ისტორიულად, ისე საერთაშორისო სამართლის მიხედვით, იაპონიის განუყოფელი ტერიტორიაა“.ცნობისთვის, საბჭოთა კავშირმა კურილის კუნძულები მეორე მსოფლიო ომის მიწურულს, 1945 წელს დაიკავა. იაპონია არქიპელაგის სამხრეთით მდებარე ოთხ კუნძულს – იტურუპს, კუნაშირს, შიკოტანსა და ჰაბომაის თავის ისტორიულ ტერიტორიად მიიჩნევს.

მსოფლიო • 1786530122

პუტინი: დასავლური ქვეყნები რუსულ კომერციულ გემებს თუ დააკავებენ, მოსკოვი საპასუხო ზომებს მიიღებს

რუსეთის პრეზიდენტის, ვლადიმერ პუტინის განცხადებით, დასავლური ქვეყნები რუსულ კომერციულ გემებს თუ დააკავებენ, მოსკოვი საპასუხო ზომებს მიიღებს. მისივე თქმით, ნატო რეგიონში რუსეთისთვის საფრთხის შექმნისთვის ძლიერდება, რითაც კონფლიქტის პოტენციალი იზრდება.ამის შესახებ პუტინმა რუსეთის წყნარი ოკეანის ფლოტის წვრთნებზე განაცხადა, რომელიც დასკვნით ეტაპზე გადავიდა.„ჩვენ ვხედავთ, რომ აქ, სამწუხაროდ, კონფლიქტის პოტენციალი იზრდება. ნატო რეგიონში შეღწევას იწყებს, იქმნება ახალი სამხედრო-პოლიტიკური ბლოკები, განლაგებულია, იგეგმება რუსეთისთვის საფრთხის შემცველი ახალი შეიარაღების სისტემების განთავსება“, – განაცხადა პუტინმა.მისივე თქმით, დასავლეთის ქვეყნები რუსული გემებისა და ქონების ჩამორთმევა ახორცილებენ, რაც, მისი თქმით მეკობრეობაა. პუტინმა აღნიშნა, რომ მოსკოვი ყველას საკადრის პასუხს გასცემს.„ჩვენ ვხედავთ, რომ ზოგიერთი ქვეყნის ხელისუფლება, საერთაშორისო საზღვაო სამართლის დარღვევით, ცდილობს, შეზღუდოს ჩვენი ეკონომიკური ოპერატორების, სამოქალაქო გემების გადაადგილება. იქამდეც კი მივიდნენ, რომ განიხილეს ჩვენი გემების ჩამორთმევა და ჩამორთმეული ქონების გაყიდვა. ეს, რა თქმა უნდა, სხვა არაფერია, თუ არა მეკობრეობა და ძარცვა. ასეთი ქმედებები პრაქტიკაში თუ განხორციელდება, იძულებული ვიქნებით, სარკისებრი პასუხი გავცეთ. და, არა აუცილებლად იმავე წყლებში, სადაც გემებზე თავდასხმები იგეგმება. თავად განვსაზღვრავთ, სად და როდის იქნება ასეთი რეაგირება აუცილებელი და მიზანშეწონილი“, – განაცხადა ვლადიმერ პუტინმა.

მსოფლიო • 1786465291

ზელენსკი: რუსეთი ჩრდილოეთ კორეისგან დამატებით რაკეტებს იღებს

უკრაინის პრეზიდენტის, ვოლოდიმირ ზელენსკის განცხადებით, რუსეთი ჩრდილოეთ კორეისგან ახალ სამხედრო მხარდაჭერას იღებს.მისი თქმით, მოსკოვმა ფხენიანისგან „დამატებითი ბალისტიკური რაკეტები“ მიიღო და რუსეთის ტერიტორიაზე ჩრდილოეთკორეელი ჯარისკაცების დამატებითი კონტინგენტის განლაგებისთვის ემზადება.უფრო ადრე ზელენსკიმ აღნიშნა, რომ ჩრდილოეთკორეული რაკეტები ზაპოროჟიეზე განხორციელებული თავდასხმისას გამოიყენეს, რომელსაც ექვსი ადამიანი ემსხვერპლა.კიმ ჩენ ინმა ვლადიმერ პუტინის ომის მხარდასაჭერად უკრაინაში ათასობით ჯარისკაცი და შეიარაღების დიდი პარტია გაგზავნა.რუსეთთან ახალი თანამშრომლობა აუმჯობესებს თავად ფხენიანის იარაღის წარმოებას და ეხმარება მას „ნაკლოვანებებისა და სუსტი ადგილების აღმოფხვრაში“ - გააფრთხილა ზელენსკიმ.„მსოფლიოში ყველას უნდა ესმოდეს, რას ნიშნავს ეს. საქმე ეხება არა მხოლოდ უკრაინაში მცხოვრები ადამიანების სიცოცხლეს და არა მხოლოდ იმ საფრთხეებს, რომელთა წინაშეც ჩვენ ვდგავართ“, - დაწერა პრეზიდენტმა პლატფორმა X-ზე.

პოლიტიკა • 1786351774

თუ წინა ხელისუფლებამ იცოდა, რომ უდიდესი გამოწვევის წინაშე იდგა ქვეყანა და არ გადადგა შესაბამისი ნაბიჯები, ეს ძალიან მძიმე ფაქტი და უდიდესი დანაშაულია - კახა კალაძე აგვისტოს ომზე

„რუსეთ-საქართველოს აგვისტოს ომთან დაკავშირებით, რა თქმა უნდა, ყველანაირი პასუხისმგებლობა ეკისრება მაშინდელ ხელისუფლებას, რომელსაც სააკაშვილი და მისი რეჟიმი წარმოადგენდა“, - ამის შესახებ თბილისის მერმა კახა კალაძემ ცხინვალის საოკუპაციო რეჟიმის მიერ გაკეთებული იმ განცხადების შეფასებისას აღნიშნა, რომელიც აგვისტოს ომთან დაკავშირებით საქართველოს პრემიერ-მინისტრ ირაკლი კობახიძის კომენტარს ეხებოდა.მისი განმარტებით, ქვეყნის პრემიერის განცხადება ეფუძნება რეზოლუციას, რომელსაც ქვეყნის მაშინდელი ხელისუფლება აწერდა ხელს.„ირაკლი კობახიძემ ციტირება გააკეთა იმისა, რაც რეზოლუციაში წერია. არაფერი სხვა არ თქმულა. რეზოლუციაზე ხელია მოწერილი. ეს არის მოღალატეობრივი ქმედება, რაც მაშინდელმა სისხლიანმა რეჟიმმა იკადრა და გააკეთა. რა თქმა უნდა, ყველანაირი პასუხისმგებლობა ეკისრება მაშინდელ ხელისუფლებას, რომელსაც სააკაშვილი და მისი რეჟიმი წარმოადგენდა. იმ პოლიტიკურმა ნაბიჯებმა და ქმედებებმა, რაც განხორციელდა, უმძიმესი შედეგები მოგვიტანა, რომელსაც, სამწუხაროდ, დღესაც ვიმკით და უდიდესი პრობლემაა ჩვენი ქვეყნისთვის“, - განაცხადა კახა კალაძემ.თბილისის მერის თქმით, წინა ხელისუფლების წარმომადგენლები ცდილობენ, მომხდარი ფაქტები წარმოაჩინონ სხვანაირად, თუმცა ოფიციალურ დოკუმენტში სხვა რამ წერია.„რამდენიმე დღის წინ ვთქვი, რომ არ არის აუცილებელი, ვინმეს განმარტება ან კომენტარი, თუნდაც, ამ შემთხვევაში, ჩემი. არსებობს კონკრეტული ვიდეოკადრები, ბძანებები, რომელთაც ხელს აწერდა მიხეილ სააკაშვილი. ამოიღეთ ეს ყველაფერი და ყველა კითხვაზე გაგცემთ შესაბამის პასუხს, რომელიც გაწუხებთ და გინდათ, რომ რაღაცნაირად შეცვალოთ ის, რაც იყო. არ გამოგივათ, რადგან ყველაფერი კარგად არის ცნობილი, საზოგადოებაც კარგად არის ინფორმირებული და ამის მტკიცებულებები არსებობს. ეს არის სამწუხარო რეალობა, რომელიც ჩვენმა ქვეყანამ მიიღო. დოკუმენტად შეგიძლიათ, გამოიყენოთ რეზოლუცია. ყველაფერი მოცემულია კონკრეტული ფაქტებით. თუ ეს ეს ყველაფერი ასე არ იყო და სხვანაირად იყო, მაშინ რატომ მოაწერეს იმ მოღალატეობრივ რეზოლუციას ხელი? ამ ადამიანების პოლიტიკის შედეგია ის, რაც 2008 წლის 8 აგვისტოს მოხდა. ეს არის სამწუხარო რეალობა და იმ კითხვებს, რომლებიც არსებობს საზოგადოებაში, აუცილებლად გაეცემა პასუხი. ყველა მოღალატემ და დამნაშავემ უნდა აგოს პასუხი“, - აღნიშნა დედაქალაქის მერმა.კახა კალაძემ ასევე უპასუხა შეკითხვას რუსეთის პრეზიდენტის ვლადიმერ პუტინის მიერ გაკეთებულ განცხადებასთან დაკავშირებით, რომლის თანახმადაც, 2008 წელს საქართველოში შეჭრის გეგმა ჯერ კიდევ 2006 წელს იყო ხელმოწერილი.„თუ ეს ყველაფერი იცოდნენ, რომ მზადდებოდა ავანტიურა, არ იმოქმედეს და არ გაატარეს შესაბამისი პოლიტიკა, ეს კიდევ უფრო ამძიმებს იმ რეალობას, რაზეც გესაუბრებით და რაც სამწუხაროდ, მოხდა. თქვენ რასაც მეუბნებით, თუ ეს მართალია, საერთოდ რაზე ვსაუბრობთ? გამოდის, რომ წინა ხელისუფლებამ იცოდა ეს ყველაფერი და არ გადადგა შესაბამისი პოლიტიკური ნაბიჯები. ეს ხომ უცებ, ერთ-ორ დღეში არ მომხდარა? ეს ხომ პროცესი იყო? დარწმუნებული ვარ, ეს ყველაფერი ზედმიწევნით კარგად იცოდნენ, რადგან არსებობს შესაბამისი სამსახურები, რომლებიც ყველა მიმართულებით მუშაობდნენ. ინფორმაცია უნდა ჰქონოდათ ამ ყველაფერზე, მით უმეტეს, როცა ტელევიზიით ჟღერდებოდა. თუ იცოდნენ, რომ უდიდესი გამოწვევის წინაშე იდგა ქვეყანა, არსებობდა პრობლემა და არ გადადგეს შესაბამისი ნაბიჯები, ეს ძალიან მძიმე ფაქტი და უდიდესი დანაშაულია. ის, რომ ქვეყანას ომი ვერ აარიდეს, იმ პოლიტიკის შედეგია, რომელიც სააკაშვილის ავანტიურული ქმედებებით ხორციელდებოდა“, - აღნიშნა კახა კალაძემ.

მსოფლიო • 1785441180

დიდი ხნის შემდეგ პირველად, რუსებმა ჩრდილოეთ კორეული რაკეტა გამოიყენეს, იმედი მაქვს, ყველა პარტნიორი გააცნობიერებს, რომ მათ დახმარებაზეა დამოკიდებული რეალური ადამიანების სიცოცხლე - ვოლოდიმირ ზელენსკი

უკრაინის პრეზიდენტი ვოლოდიმირ ზელენსკი აცხადებს, რომ წინასწარი მონაცემებით, დნეპროპეტროვსკის ოლქის დასახლებულ პუნქტზე რუსეთის მიერ განხორციელებული იერიშისას ჩრდილოეთ კორეული ბალისტიკური რაკეტა გამოიყენეს.ზელენსკის თქმით, რადუშნოში ბალისტიკური რაკეტა „ჩვეულებრივ სახლს, ჩვეულებრივ ოჯახს“ მოხვდა, რის შედეგადაც მშობლები და მათი შვილები დაიღუპნენ.„რუსებმა დიდი ხნის შემდეგ პირველად გამოიყენეს ჩრდილოეთ კორეული რაკეტა, ასეთია წინასწარი მონაცემები. რა თქმა უნდა, კიდევ ჩატარდება ექსპერტიზა და ყველაფერი გადამოწმდება, მაგრამ ამ ეტაპზე საუბარია ჩრდილოკორეულ ბალისტიკურ რაკეტაზე. ეს არის მოსკოვის რეჟიმისა და ჩრდილოეთ კორეის ხელისუფლების თანამშრომლობა – რაკეტების, ევროპაში ჩვენს საზღვრებთან ჩრდილოეთ კორეული კონტინგენტის განთავსებისა და უკრაინელი ბავშვების მკვლელობის მიზნით“, – განაცხადა უკრაინის პრეზიდენტმა.ზელენსკიმ აღნიშნა, რომ ამ თავდასხმას საერთაშორისო საზოგადოებაში ბევრი ქვეყანა გამოეხმაურა და დაგმო. მისი თქმით, ევროპულმა ქვეყნებმა ასევე გააკეთეს განცხადებები იმ რუსულ რაკეტასთან დაკავშირებით, რომელიც, უკრაინის პრეზიდენტის თქმით, პოლონეთის ტერიტორიაზე შევიდა და ლუბლინის მახლობლად, მინდორში აფეთქდა.უკრაინის პრეზიდენტმა განაცხადა, რომ მთავარი ახლა მხოლოდ თანაგრძნობა და დაგმობა კი არა, არამედ უკრაინისთვის საჰაერო თავდაცვის სისტემებისთვის საჭირო რაკეტების მიწოდებაა.„ყველაზე მნიშვნელოვანია არა მხოლოდ თანაგრძნობა და არა მხოლოდ დაგმობა, არამედ საჰაერო თავდაცვისთვის საჭირო რაკეტები – სწორედ რუსეთზე ასეთი ზეწოლა შეიძლება, გახდეს ის ფაქტორი, რომელიც შეაჩერებს ამ უაზრო ომს, დარტყმებსა და ტერორს“, – განაცხადა ზელენსკიმ.ზელენსკიმ აღნიშნა, რომ ომის დასრულება დიდი ხნის წინ იყო შესაძლებელი, თუმცა, მისი თქმით, ვლადიმერ პუტინი ამას არ აკეთებს და ცდილობს, შეიარაღება სხვადასხვა ქვეყნიდან, მათ შორის ჩრდილოეთ კორეიდან და ირანიდან მიიღოს.„იმედი მაქვს, რომ ყველა ჩვენი პარტნიორი, პირველ რიგში, ამერიკელი პარტნიორები და ევროპელი მეგობრები, გააცნობიერებენ, რომ მათ დახმარებაზეა დამოკიდებული რეალური ადამიანების სიცოცხლე“, – აღნიშნა უკრაინის პრეზიდენტმა.

მსოფლიო • 1785432060

The Telegraph: ფრიდრიხ მერცი საიდუმლო გეგმას ამუშავებს, რომლის მიზანია აღკვეთოს გერმანიის პროკრემლისტურად განწყობილი ფედერალური მიწების მხრიდან ნატოს იმ გეგმის შეფერხება, რომელიც რუსული შეჭრისგან თავდაცვას ითვალისწინებს

ფრიდრიხ მერცი საიდუმლო გეგმას ამუშავებს, რომლის მიზანია აღკვეთოს გერმანიის პროკრემლისტურად განწყობილი ფედერალური მიწების მხრიდან ნატოს იმ გეგმის შეფერხება, რომელიც რუსული შეჭრისგან თავდაცვას ითვალისწინებს, - წერს ბრიტანული გამოცემა The Telegraph.საფრთხე, რომ პარტიამ „ალტერნატივა გერმანიისთვის“ ხელი შეუშალოს მოკავშირე ძალების ტრანზიტს აღმოსავლეთ გერმანიის ორ ფედერალურ მიწაზე, სადაც სექტემბრის არჩევნებში AfD-ის გამარჯვებას პროგნოზირებენ.თუ პარტია საქსონია-ანჰალტის ან მეკლენბურგ-წინა პომერანიის მიწებზე აბსოლუტურ უმრავლესობას მოიპოვებს, მას მიეცემა შესაძლებლობა, ჩამოაყალიბოს რეგიონის მთავრობა და ხელში ჩაიგდოს კონტროლი შიდა უსაფრთხოებაზე, პოლიციურ სტრუქტურებსა და სხვა უფლებამოსილებებზე.რეგიონის მთავრობას შეუძლია გაჭიანუროს ნებართვებისა და თანხმობების გაცემის პროცესი ბიუროკრატიული ბარიერებით, შეაფერხოს ჯარისა და აღჭურვილობის გადასროლა, დააყოვნოს რეგიონული პოლიციის ჩართვა და უარი თქვას გზებზე სამხედრო ტექნიკისთვის პრიორიტეტული ზოლის ან უფლების დათმობაზე.ნატოს წარმომადგენლებს აქვთ სადაზვერვო ინფორმაცია, რომლის თანახმადაც, ვლადიმერ პუტინი ემზადება პოლიტიკური მოკავშირეების გამოსაყენებლად, რათა ჩახლართოს და გააჭიანუროს ალიანსის პასუხი რუსეთის შესაძლო აგრესიაზე აღმოსავლეთ ფლანგზე.პრევენციის მიზნით, ფრიდრიხ მერცის მთავრობა შეიმუშავებს მექანიზმებს, რომლებიც კრიზისულ სიტუაციაში რეგიონული მთავრობების უფლებამოსილებების გვერდის ავლით გადაწყვეტილების მიღებას გახდის შესაძლებელს, ამასთანავე უზრუნველყოფს მეზობელ ფედერალურ მიწებზე არსებული საკვანძო ინფრასტრუქტურისა და მაღალჩინოსნების უსაფრთხოებას.გერმანიას, რომელიც ფართო უფლებამოსილებებით აღჭურვილი 16 ფედერალური მიწისგან შედგება, მეტსახელად „ნატოს წრიულ გზაჯვარედინს“ უწოდებენ - მიზეზი ის მნიშვნელოვანი ლოგისტიკური მარშრუტებია, რომლებიც ქვეყნის ტერიტორიის გავლით რუსეთის საზღვრისკენ მიემართება.„კრემლისადმი ლოიალური პოლიტიკოსების ჩართვა იმისათვის, რომ შეფერხდეს ნატოს ძალისხმევა ჯარების სწრაფ დისლოკაციასთან დაკავშირებით, შესაძლოა საკმაოდ ეფექტური იყოს“, - აღნიშნა დასავლეთ ევროპის თავდაცვის უწყების წარმომადგენელმა The Telegraph-ისა და Die Welt-ის ერთობლივ საგამოძიებო მასალაში.წყაროს თქმით: „შესაძლოა პუტინის ამოცანას არც წარმოადგენდეს ნატოს სამხედრო ველზე დამარცხება, ვინაიდან ეს რთული ამოცანაა. მაგრამ თუ იგი ალიანსის შიგნით პოლიტიკურ ბზარებს მიაგნებს და მათ კიდევ უფრო გაამწვავებს, ეს იქნება ყველაზე მოკლე გზა ნატოს რღვევისკენ“.

მსოფლიო • 1785184529

პუტინმა ხელი მოაწერა ბრძანებას, რომლის მიხედვით, ქვეყნის შეიარაღებული ძალების რაოდენობა გაიზრდება

რუსეთის პრეზიდენტმა, ვლადიმერ პუტინმა ხელი მოაწერა ბრძანებას, რომლის მიხედვითაც ქვეყნის შეიარაღებული ძალების რაოდენობა 27 000 ადამიანით გაიზრდება, მათ შორის, 25 000 სამხედრო მოსამსახურით.შედეგად, რუსეთის შეიარაღებული ძალების რაოდენობა 2 426 130 ადამიანს შეადგენს, ხოლო სამხედრო მოსამსახურეთა რიცხვი 1 535 000-ს მიაღწევს.ეს 2026 წელს რუსეთის პრეზიდენტის მიერ შეიარაღებული ძალების რაოდენობის გაზრდის შესახებ მიღებული უკვე მესამე გადაწყვეტილებაა.მანამდე, უკრაინის პრეზიდენტმა, ვოლოდიმირ ზელენსკიმ განაცხადა, რომ ვლადიმერ პუტინი მობილიზაციის ახალი ტალღისთვის ემზადება.