მსოფლიო • 1783963920

მედია: ევროკავშირის ქვეყნებს შორის არსებული უთანხმოების გამო, რუსეთის წინააღმდეგ სანქციების 21-ე პაკეტის მიღება ვერ მოხერხდა - მხარეებს შორის მთავარი დავის საგანი რუსეთის მიერ წარმოებულ ომში მონაწილე პირებისთვის ევროკავშირში შესვლის აკრძალვა და ნავთობის ფასის ლიმიტებთან დაკავშირებული საკითხებია

ევროკავშირის ქვეყნებს შორის არსებული უთანხმოების გამო, რუსეთის წინააღმდეგ სანქციების 21-ე პაკეტის მიღება ვერ მოხერხდა - მხარეებს შორის მთავარი დავის საგანი რუსეთის მიერ წარმოებულ ომში მონაწილე პირებისთვის ევროკავშირში შესვლის აკრძალვა და ნავთობის ფასის ლიმიტებთან დაკავშირებული საკითხებია, - წერს „პოლონური რადიო“.საფრანგეთი და იტალია ეწინააღმდეგებიან რუსეთის მხარეს მებრძოლი პირებისთვის ევროკავშირის ქვეყნებში შესვლის აკრძალვას. წყაროების ცნობით, ორივე ქვეყანა შეშფოთებულია საკონსულოებზე დამატებითი ტვირთის გამო, რადგან სწორედ მათთან შედის რუსეთის მოქალაქეებისგან ვიზებზე განაცხადების ყველაზე დიდი რაოდენობა.ევროკავშირის დიპლომატიის ხელმძღვანელმა, კაია კალასმა განაცხადა, რომ ყოფილ სამხედროებთან დაკავშირებით მუშაობა გაგრძელდება, რადგან ეს უსაფრთხოებისთვის საფრთხეს წარმოადგენს და დაუშვებელია ამ ადამიანების ევროპაში შეშვება.სანქციების პაკეტთან დაკავშირებით სხვა წევრ ქვეყნებსაც გააჩნიათ განსხვავებული პოზიციები. კერძოდ, ბულგარეთი ეწინააღმდეგება პატრიარქ კირილესთვის სანქციების დაწესებას, გერმანია და პორტუგალია არ უჭერენ მხარს რუსული თევზის იმპორტის აკრძალვას, ხოლო საბერძნეთი, კვიპროსი და მალტა წინააღმდეგნი არიან რუსული ნავთობისა და თხევადი ბუნებრივი აირის მიმართ დამატებითი შეზღუდვების დაწესების.ამასთან, მნიშვნელოვანი კამათი მიმდინარეობს საზღვაო გზით გადაზიდულ რუსულ ნავთობზე ფასის ლიმიტთან დაკავშირებით. თუ ოთხშაბათამდე შეთანხმება ვერ მიიღწევა, ლიმიტი ავტომატურად გაიზრდება 44-დან 58 დოლარამდე ბარელზე, რამაც შესაძლოა კრემლის შემოსავლები ნავთობის ექსპორტიდან მნიშვნელოვნად გაზარდოს.სანქციების პაკეტის შეთანხმების მორიგი მცდელობა ოთხშაბათს განხორციელდება.

მსოფლიო • 1783749886

ნიდერლანდების დაზვერვა სკანდალურ ინფორმაციას ავრცელებს

ნიდერლანდების სადაზვერვო სამსახურების განცხადებით, რუსეთი ნატოს სამხედრო ბაზებსა და სამხედრო მარშრუტებზე მეთვალყურეობას ინტერნეტთან დაკავშირებული სამოქალაქო კამერების, მათ შორის კარის ზარის კამერების, გატეხის გზით ახორციელებდა. ინფორმაციას The Telegraph-ი ავრცელებს.ნიდერლანდების შიდა უსაფრთხოების სამსახურის და სამხედრო დაზვერვის სამსახურის ერთობლივი გამოძიების თანახმად, კრემლთან დაკავშირებული ჰაკერები იმ კამერებზე იღებდნენ წვდომას, რომლებიც სამხედრო ტვირთების გადაადგილების მარშრუტებზე იყო განლაგებული. მათი მიზანი უკრაინისთვის გაგზავნილი სამხედრო ტექნიკისა და შეიარაღების გადაადგილების მონიტორინგი იყო.დაზვერვის სამსახურების ინფორმაციით, რუსული ოპერაცია მიმართული იყო „ევროპის ნატოს წევრი ქვეყნების, მათ შორის ნიდერლანდებისა და უკრაინის“ წინააღმდეგ.„ის ორგანიზაციები, რომლებსაც ამ მარშრუტებზე ინტერნეტთან დაკავშირებული კამერები აქვთ, უკვე გავაფრთხილეთ, რათა შესაბამისი ზომები მიიღონ“, - აცხადებენ ნიდერლანდების შიდა უსაფრთხოებისა და სამხედრო დაზვერვის სამსახურებში. მათ ოპერაციას „რუსეთის ფართომასშტაბიანი სადაზვერვო კამპანია“ უწოდეს.როგორც გამოცემა იუწყება, IP-კამერები, ანუ ინტერნეტთან დაკავშირებული კამერები, ბოლო წლებში ფართოდ გავრცელდა, რასაც ხელი იაფმა ჩინურმა მოწყობილობებმა და მაღალსიჩქარიანმა ინტერნეტმა შეუწყო.ნიდერლანდების დაზვერვას არ დაუკონკრეტებია, კონკრეტულად რა ტიპის კამერები გატეხეს, თუმცა აღნიშნავს, რომ კარის ზარის ჭკვიანი კამერები ხშირად გამოიყენება საცხოვრებელი სახლებისა და სხვა ობიექტების დისტანციური მონიტორინგისთვის. ჰაკერები კი სპეციალური პროგრამების გამოყენებით ეძებენ ინტერნეტში დაუცველ მოწყობილობებს.გამოძიების მიხედვით, მრავალი კამერა სათანადოდ არ იყო დაცული. ხშირად ისინი იყენებდნენ სტანდარტულ პაროლებს, მოძველებულ პროგრამულ უზრუნველყოფასა და ქარხნულ პარამეტრებს.„როდესაც IP-კამერა იდენტიფიცირდება, თავდამსხმელს შეუძლია ინტერნეტის საშუალებით მასზე წვდომის მოპოვება სცადოს. ეს ხშირად საკმაოდ მარტივია, რადგან ინტერნეტთან დაკავშირებული ბევრი IP-კამერა არასაკმარისად არის დაცული“, - აღნიშნულია დაზვერვის ანგარიშში.კამერების გატეხა ბოლო წლებში თანამედროვე ომის ერთ-ერთ გავრცელებულ მეთოდად იქცა. პრაქტიკულად ნებისმიერი კამერა, რომელიც ქუჩაში, საცხოვრებელ სახლთან ან კომერციულ ობიექტთან არის დამონტაჟებული, სადაზვერვო ინფორმაციის მოსაპოვებლად შეიძლება გამოიყენონ.The Telegraph-ის ცნობით, უკრაინელ ჰაკერებს რუსული სათვალთვალო კამერები რუსეთის სამხედრო ძალების გადაადგილების მონიტორინგისა და შორი მოქმედების იერიშების კოორდინაციისთვისაც გამოუყენებიათ. ამავე მეთოდს კიევმა ნოვოროსიისკის პორტში განთავსებულ რუსულ წყალქვეშა ნავზე წყალქვეშა დრონით განხორციელებული თავდასხმის დროსაც მიმართა.

მსოფლიო • 1783615200

ლავროვი: რუსული მხარე აღარ დაუჯერებს დასავლეთს უკრაინასთან დაკავშირებით მოლაპარაკებების სურვილთან დაკავშირებით

რუსული მხარე აღარ დაუჯერებს დასავლეთს უკრაინასთან დაკავშირებით მოლაპარაკებების სურვილთან დაკავშირებით, - განაცხადა რუსეთის საგარეო საქმეთა მინისტრმა სერგეი ლავროვმა პრესკონფერენციაზე.„აღარ დავუჯერებთ დასავლეთს იმაში, რომ მას მოლაპარაკების გზით გადაწყვეტა სურს. კეთილი განწყობისა და იმედების ეს მარაგი საბოლოოდ ამოიწურა“, - განაცხადა მან.

მსოფლიო • 1783607640

Euronews: საფრანგეთისა და იტალიის წინააღმდეგობის გამო, ევროკავშირი განიხილავს რუსი სამხედროებისა და ვეტერანებისთვის ვიზების გაცემის აკრძალვის უფრო შეზღუდულ ვერსიას - კერძოდ, აღნიშნული ზომა შეეხება მხოლოდ მოკლევადიან ვიზებს და იმ პირებს, რომლებმაც უშუალოდ მიიღეს მონაწილეობა უკრაინაში საომარ მოქმედებებში

საფრანგეთისა და იტალიის წინააღმდეგობის გამო, ევროკავშირი განიხილავს რუსი სამხედროებისა და ვეტერანებისთვის ვიზების გაცემის აკრძალვის უფრო შეზღუდულ ვერსიას - კერძოდ, აღნიშნული ზომა შეეხება მხოლოდ მოკლევადიან ვიზებს და იმ პირებს, რომლებმაც უშუალოდ მიიღეს მონაწილეობა უკრაინაში საომარ მოქმედებებში, - წერს Euronews.ეს აკრძალვა უკრაინაში რუსეთის სრულმასშტაბური შეჭრის გამო დაწესებული ევროკავშირის სანქციების 21-ე პაკეტის ნაწილი იქნება.ბოლო კვირების განმავლობაში საფრანგეთი და იტალია ეწინააღმდეგებოდნენ სამხედრო პირთა სრულ აკრძალვას. მათი არგუმენტით, ეს საკითხი სანქციების ნაცვლად სავიზო პოლიტიკის ფარგლებში უნდა გადაწყდეს. ამასთან, ქვეყნებმა გააფრთხილეს ევროკავშირი, რომ აღნიშნულმა ზომამ შესაძლოა პრაქტიკული სირთულეები შეუქმნას იმ სახელმწიფოებს, რომლებიც რუსული ვიზების განაცხადების დიდ ნაკადს ამუშავებენ.ევროკავშირის საბჭოს თავმჯდომარე ქვეყანამ, ირლანდიამ, წამოაყენა წინადადება, შეზღუდვა მხოლოდ მოკლევადიან ვიზებზე გავრცელდეს.აკრძალვის მასშტაბი ასევე შეიზღუდა და შეეხება მხოლოდ იმ პირებს, რომლებიც მსახურობენ ან მსახურობდნენ რუსეთის შეიარაღებულ ძალებში ან მოსკოვის მიერ კონტროლირებად/მის სასარგებლოდ მოქმედ არარეგულარულ ფორმირებებში.ის გავრცელდება მხოლოდ იმ პირებზე, რომლებმაც უშუალო მონაწილეობა მიიღეს უკრაინაში საბრძოლო მოქმედებებში 2022 წლის თებერვალში რუსეთის სრულმასშტაბური შეჭრის შემდეგ.თავდაპირველი წინადადება ბევრად უფრო ფართო იყო და მოიცავდა შეიარაღებულ ძალებში ნებისმიერი როლის მქონე პირებს, მათ შორის ადმინისტრაციულ და ლოგისტიკურ პერსონალს. შესწორებული პაკეტი კი აღარ გულისხმობს აპრიორი იმას, რომ განმცხადებელი მონაწილეობდა ომში, თუ ის საპირისპიროს არ დაამტკიცებს.

მსოფლიო • 1783606680

უკრაინული მედია: რუსეთის წინააღმდეგ ევროკავშირის სანქციების 21-ე პაკეტი შესაძლოა ორშაბათს ევროკავშირის საგარეო საქმეთა მინისტრების შეხვედრისას დაამტკიცონ, თუმცა „შემსუბუქებული“ სახით - კერძოდ, სანქციების სიაში არ იქნება რუსეთის მართლმადიდებელი ეკლესიის პატრიარქი

რუსეთის წინააღმდეგ ევროკავშირის სანქციების ახალი, 21-ე პაკეტი შესაძლოა ორშაბათს ევროკავშირის საგარეო საქმეთა მინისტრების შეხვედრისას დაამტკიცონ, თუმცა „შემსუბუქებული“ სახით. კერძოდ, სანქციების სიაში არ იქნება რუსეთის მართლმადიდებელი ეკლესიის პატრიარქი. ინფორმაციას ამის შესახებ უკრაინული გამოცემა „ევროპეისკა პრავდა“ ბრიუსელში საკუთარ წყაროებზე დაყრდნობით ავრცელებს.ევროკავშირის საგარეო საქმეთა საბჭომ 13 ივლისს შესაძლოა დაამტკიცოს რუსეთის წინააღმდეგ სანქციების 21-ე პაკეტი, თუმცა კომპრომისულ ვერსიაში: რუსეთის მართლმადიდებელი ეკლესიის პატრიარქის მოხსენიების გარეშე და რუსი სამხედროებისთვის ევროკავშირში შესვლის აკრძალვის შესახებ „შერბილებული“ ფორმულირებებით.„ჯერ კიდევ ერთი კვირის წინ ჩანდა, რომ წევრ სახელმწიფოებს შორის არსებული უთანხმოება 21-ე პაკეტის ძირითად დებულებებთან დაკავშირებით ზედმეტად ღრმა იყო და მისი შემოდგომისთვის გადატანა მოგვიწევდა. თუმცა, 12 ივლისს მუდმივ წარმომადგენელთა კომიტეტის (Coreper) სხდომაზე ახალი ვარიანტის განხილვამ იმედი გააჩინა, რომ კომპრომისი მოიძებნება“, - განაცხადა ერთ-ერთმა წყარომ.კერძოდ, პაკეტის დასამტკიცებლად ევროკავშირი, სავარაუდოდ, შემდეგ კომპრომისებზე წავა:ბულგარეთისა და იტალიის მოთხოვნით, შემოთავაზებული სანქციების სიიდან ამოიღებს რუსეთის მართლმადიდებელი ეკლესიის პატრიარქსა და რუსული „ლუკოილის“ დამფუძნებელს, ვაგიტ ალეკპეროვს.იტალიის, საფრანგეთის, საბერძნეთის, კვიპროსისა და სხვა ქვეყნების თხოვნით, შეარბილებს ფორმულირებას უკრაინის წინააღმდეგ ომში მონაწილე რუსი კომბატანტებისთვის ევროკავშირში შესვლის აკრძალვის შესახებ (საუბარია აკრძალვიდან ყოფილი სამხედროების შესაძლო გამონაკლისზე).გაამარტივებს ფორმულირებას რუსული თევზის ევროკავშირში იმპორტის აკრძალვის შესახებ, კერძოდ, გერმანიის, საფრანგეთის, ნიდერლანდებისა და პოლონეთის ინტერესებიდან გამომდინარე, უარს იტყვის რუსეთიდან და ბელარუსიდან ვირთევზას იმპორტის სრულ აკრძალვაზე (ეს უკანასკნელი რუსული თევზისთვის ევროკავშირში „უკანა კარია“).საბერძნეთის, კვიპროსის, მალტასა და სხვათა ზეწოლის შედეგად გააუქმებს რუსეთიდან თხევად გაზსა და შესაბამის ტანკერებთან დაკავშირებულ რიგ წინადადებებს.

პოლიტიკა • 1783597191

სერბეთის ევროკავშირში გაწევრიანების შესახებ მოლაპარაკებების მომდევნო კლასტერის გახსნას რვა სახელმწიფო, მათ შორის, ბალტიისპირეთის ქვეყნები ეწინააღმდეგებიან - ალექსანდრ ვუჩიჩის განცხადებით, სერბეთს რუსეთის წინააღმდეგ სანქციების დაწესებას სთხოვენ

მედიაში გავრცელებული ინფორმაციით, ევროკავშირის წევრი რვა სახელმწიფო, მათ შორის, ნიდერლანდები, შვედეთი, ლიეტუვა, ლატვია და ესტონეთი, ეწინააღმდეგებიან სერბეთის ევროკავშირში გაწევრიანების შემდეგი კლასტერის გახსნას. ნიდერლანდები ამის მიზეზად კანონის უზენაესობასთან დაკავშირებულ შეშფოთებას ასახელებს, სხვა ქვეყნები კი რუსეთის წინააღმდეგ სანქციებთან დაკავშირებით სერბეთის პოზიციაზე ამახვილებენ ყურადღებას.მედიის ცნობით, ევროკავშირის ელჩების შეხვედრაზე რვა წევრმა სახელმწიფომ - ესტონეთმა, ლატვიამ, ლიეტუვამ, ბელგიამ, ნიდერლანდებმა, შვედეთმა, ბულგარეთმა და ხორვატიამ - სერბეთისთვის მესამე კლასტერის გახსნას წინააღმდეგობა გაუწია. მათი განცხადებით, ამის მიზეზია როგორც სამართლის უზენაესობის სფეროში არსებული პრობლემები, ისე სერბეთის პოზიცია რუსეთთან მიმართებით.სერბეთის პრეზიდენტმა ალექსანდარ ვუჩიჩმა განაცხადა, რომ სერბეთზე ზეწოლა ხორციელდება, რათა ევროკავშირში ინტეგრაციის გზაზე, რუსეთის წინააღმდეგ სანქციები დააწესოს და შეზღუდოს რუსული მედიის საქმიანობა, თუმცა, მისივე თქმით, ქვეყანა ზეწოლის მიუხედავად, საკუთარ პოლიტიკას არ შეცვლის."თანამედროვე სამყაროში თავისუფლება რთულია", - აღნიშნა ვუჩიჩმა.

მსოფლიო • 1783587476

უკრაინა საბერძნეთს აფრთხილებს, რომ ღია ზღვაში ნებისმიერი რუსული გემი კვლავ მათი სამიზნე იქნება

უკრაინა საბერძნეთს აფრთხილებს, რომ ღია ზღვაში ნებისმიერი რუსული გემი კვლავ მათი სამიზნე იქნება. ამის შესახებ EURACTIV წერს. ამის მიზეზი გახდა ინციდენტი საბერძნეთის კუნძულ ლეფკადასთან, სადაც უკრაინული საზღვაო დრონი იპოვეს.ბერძნული მხარის ინფორმაციით, სავარაუდო სამიზნე იყო რუსული ტანკერი ხმელთაშუა ზღვაში, მაგრამ დრონი ტექნიკური გაუმართაობის გამო მწყობრიდან გამოვიდა და ჩამოვარდა. ამ ფაქტმა საბერძნეთის გაღიზიანება გამოიწვია, მათ უკრაინას ოფიციალური ბოდიშის მოხდა მოსთხოვეს და გარანტია, რომ მსგავსი შემთხვევა აღარ განმეორდება, რადგან არ სურს, რომ ხმელთაშუა ზღვა ომის ზონად გადაიქცეს.უკრაინამ ოფიციალურად ბოდიში მოიხადა მომხდარის გამო, თუმცა, ამავე ინფორმაციით, არაოფიციალურად განაცხადა, რომ არ აპირებს, უარი თქვას რუსეთის გემებზე თავდასხმებზე, თუ ამას თავდაცვისთვის საჭიროდ ჩათვლის.უკრაინა ასევე ამბობს, რომ 1996 წლის უკრაინა–საბერძნეთის მეგობრობის ხელშეკრულების მიხედვით, მსგავს საკითხებზე ჯერ კონსულტაციები უნდა გამართულიყო, ხოლო, მათი აზრით, საბერძნეთმა ეს არ გააკეთა და საკითხი მედიაში ზედმეტად პოლიტიზებული გახდა.

პოლიტიკა • 1783587348

დავით ქართველიშვილი: უკრაინული საზოგადოება ხელისუფლებას სიგნალს უგზავნის - ხალხი ჯერ კიდევ მზად არის სახელმწიფოს გვერდით დადგეს, მაგრამ სულ უფრო ნაკლებად არის მზად უსასრულო მობილიზაციისა და ომის ტვირთის ასატანად

პარტია „ხალხის ძალის“ წევრი, დავით ქართველიშვილი სოციალურ ქსელში ეხმაურება უკრაინაში მიმდინარე მოვლენებს და წერს, რომ ტრამპი-ზელენსკის მოლაპარაკების შემდეგ, ლვოვში პროტესტის მონაწილეებმა გზა გადაუკეტეს სამხედრო გაწვევის ცენტრის თანამშრომლებს და მათი სამსახურეობრივი ავტომობილი გადააყირავეს. ანალიტიკოსი წერს, რომ მსგავსი ინციდენტი ივნისში კიევშიც დაფიქსირდა, რაც მეტყველებს მოსახლეობის სურვილზე, შეწყდეს საომარი მოქმედებები. ქართველიშვილი აღნიშნავს, რომ იმავეს აჩვენებენ საზოგადოებრივი გამოკითხვებიც.„სხვადასხვა კვლევის თანახმად, უკრაინის მოქალაქეთა მნიშვნელოვანი ნაწილი მზად არის, მხარი დაუჭიროს ცეცხლის შეწყვეტას არსებული ფრონტის ხაზის პირობებში, თუ უსაფრთხოების დამატებითი გარანტიები იქნება უზრუნველყოფილი. ეს არ არის კაპიტულაციის მოთხოვნა, ეს არის მოთხოვნა, რომ შეწყდეს აქტიური სამხედრო ფაზა და ქვეყანა გადავიდეს შედარებით სტაბილურ მდგომარეობაში“ - წერს ქართველიშვილი.ანალიტიკოსი ხაზს უსვამს იმასაც, რომ უკრაინა შესაძლოა მივიდეს არა მშვიდობამდე, არამედ ომის ხანგრძლივ პაუზამდე.„ანკარაში დასრულებული ტრამპისა და ზელენსკის მოლაპარაკებების შემდეგ - 8 ივლისს, საღამოს, ლვოვში ორგანიზებულ პროტესტანტთა დიდმა ნაწილმა გადაუკეტა გზა სამხედრო გაწვევის ცენტრის (ТЦК) თანამშრომლებს და გადააყირავა მათი სამსახურებრივი ავტომობილი. მსგავსი ინციდენტი, ადამიანთა მასობრივი მონაწილეობით, კიევშიც დაფიქსირდა ივნისში. ანუ, აღნიშნული ცალკეული, თუმცა ხშირი შემთხვევების პროცესი - გადავიდა მობილიზაციისადმი წინააღმდეგობის მასობრივ, ორგანიზებულ, სოციალურად გადამდებ და მზარდ ტენდენციაში.ამ კონტექსტში განსაკუთრებით სიმბოლურია ლვოვი. თუ დაპირისპირება ТЦК-სთან მხოლოდ ომით დაღლილ რეგიონებში კი არა, არამედ იმ ქალაქშიც იფეთქებს, რომელიც წლების განმავლობაში უკრაინული ნაციონალური მობილიზაციისა და ანტირუსული განწყობების ერთ-ერთ მთავარ სიმბოლოდ ითვლებოდა, ეს ნიშნავს, რომ ბზარი უკვე აღარ გადის ხაზზე „პატრიოტიზმი/არაპატრიოტიზმი“. ბზარი გადის ხაზზე: „სახელმწიფო ადამიანურ რესურსს ითხოვს, ხოლო საზოგადოებას სულ უფრო ნაკლებად სურს მისი გაღება“. ეს უკვე აღარ არის გეოპოლიტიკური დისკუსია. ეს არის საზოგადოების მკაფიო და პრაქტიკული მოთხოვნა ხელისუფლების მიმართ: შეაჩერეთ ცეცხლი და იპოვეთ გზა საომარი მოქმედებების დასასრულებლად.საზოგადოებრივი გამოკითხვებიც მსგავს სურათს აჩვენებს. სხვადასხვა კვლევის თანახმად, უკრაინის მოქალაქეთა მნიშვნელოვანი ნაწილი მზად არის, მხარი დაუჭიროს ცეცხლის შეწყვეტას არსებული ფრონტის ხაზის პირობებში, თუ უსაფრთხოების დამატებითი გარანტიები იქნება უზრუნველყოფილი. სოციოლოგიის კიევის საერთაშორისო ინსტიტუტის (КМИС) კვლევებით, ამ ფორმულირებას გამოკითხულთა 61% უჭერს მხარს. ეს არ არის კაპიტულაციის მოთხოვნა, ეს არის მოთხოვნა, რომ შეწყდეს აქტიური სამხედრო ფაზა და ქვეყანა გადავიდეს შედარებით სტაბილურ მდგომარეობაში.სწორედ ამიტომ, სულ უფრო რეალისტურად გამოიყურება ე.წ. „კორეული სცენარი“ - არა სრულფასოვანი სამშვიდობო ხელშეკრულება, არა ისტორიული შერიგება და არა კონფლიქტის საბოლოო სამართლებრივი დასრულება, არამედ ცეცხლის შეწყვეტა, ფრონტის ხაზის გაყინვა, შედეგების ურთიერთარაღიარება და მრავალწლიანი პოლიტიკური დაპირისპირების გაგრძელება. შესაძლოა, უკრაინა მივიდეს არა მშვიდობამდე, არამედ ომის ხანგრძლივ პაუზამდე. ხოლო დღევანდელი კონფლიქტები ТЦК-ს გარშემო სწორედ ის ერთ-ერთი ყველაზე მკაფიო სიგნალია, რომელსაც საზოგადოება ხელისუფლებას უგზავნის: ხალხი ჯერ კიდევ მზად არის სახელმწიფოს გვერდით დადგეს, მაგრამ სულ უფრო ნაკლებად არის მზად უსასრულო მობილიზაციისა და ომის ტვირთის ასატანად,“- წერს დავით ქართველიშვილი.

ტაბლოიდი • 1783576860

სკანდალი ირაკლი ფირცხალავას გარშემო - 22 წლის მოდელი აცხადებს, რომ მომღერლისგან ორსულადაა და „ლავ-სთორის“ დეტალებს ფასიან არხზე მოყვება

რუსულ ტაბლოიდურ მედიაში ირაკლი ფირცხალავას პირად ცხოვრებასთან დაკავშირებით ახალი სკანდალის შესახებ წერენ. 22 წლის მოდელი ეკატერინა (კატია) ლუკიანოვა აცხადებს, რომ მომღერლისგან ორსულად არის და მათი ურთიერთობის დეტალების გასაჯაროება გადაწყვიტა.მედიის ცნობით, ლუკიანოვა ამბობს, რომ ფირცხალავასთან ურთიერთობა თავდაპირველად საიდუმლოდ ჰქონდათ. მისი თქმით, ისინი ერთმანეთს ივნისის დასაწყისში შეხვდნენ, მალევე დაახლოვდნენ და გარკვეული პერიოდის შემდეგ გოგონამ გაიგო, რომ ორსულად იყო.მოდელის განცხადებით, ორსულობის შესახებ ინფორმაციის შემდეგ ფირცხალავა თავდაპირველად დადებითად შეხვდა ამბავს, თუმცა მოგვიანებით, მისი თქმით, ურთიერთობაში სირთულეები გაჩნდა.ლუკიანოვა ამტკიცებს, რომ რთულ პერიოდში მხარდაჭერა აკლდა და სწორედ ამის გამო გადაწყვიტა, საზოგადოებისთვის მათი ურთიერთობის შესახებ ესაუბრა. მან სოციალურ ქსელში გააზიარა მიმოწერის ფრაგმენტებიც, რომლებიც, მისი თქმით, მომღერალთან ჰქონდა.„მძიმე პერიოდს მარტო გავდივარ“, – აცხადებს მოდელი და ამბობს, რომ ორსულობის პერიოდში მისთვის განსაკუთრებით მნიშვნელოვანი იყო პარტნიორის მხარდაჭერა.სკანდალის შემდეგ ლუკიანოვამ შექმნა ფასიანი არხი, სადაც მომხმარებლებს მათი ურთიერთობის შესახებ დამატებითი დეტალების გაზიარებას ჰპირდება.რუსული მედიის ინფორმაციით, არხზე წვდომის ღირებულება თვეში 990 რუბლია. მოდელი აცხადებს, რომ იქ ისაუბრებს იმაზე, „რაც რეალურად მოხდა, ყოველგვარი დამახინჯების გარეშე“.მანამდე ლუკიანოვას სახელი სხვა ცნობილ ადამიანთან, რეპერ ტიმატისთანაც, იყო დაკავშირებული, თუმცა თავად მოდელი პირად ცხოვრებაზე საჯაროდ საუბარს ერიდებოდა.ამ დროისთვის ირაკლი ფირცხალავას მხრიდან ლუკიანოვას განცხადებებზე ოფიციალური ვრცელი კომენტარი არ გავრცელებულა. 

მსოფლიო • 1783525292

ევროპარლამენტმა ზელენსკი პოლონეთის წინააღმდეგ „გაუმართლებელი ესკალაციისთვის“ გააკრიტიკა

ევროპარლამენტმა მხარი დაუჭირა უკრაინის შესახებ ანგარიშის შესწორებას, რომელიც პრეზიდენტ ზელენსკის აკრიტიკებს ელიტური სამხედრო დანაყოფისთვის იმ უკრაინული ჯგუფის სახელის დარქმევის გამო, რომელმაც, პოლონეთის მტკიცებით, მეორე მსოფლიო ომის დროს ათობით ათასი ეთნიკური პოლონელი მოკლა. ინფორმაციას ამის შესახებ უკრაინული მედია ავრცელებს.კიევსა და ვარშავას შორის დიპლომატიური დაძაბულობა 26 მაისს გამწვავდა, მას შემდეგ, რაც ზელენსკიმ სამხედრო დანაყოფს „უკრაინის მეამბოხეთა არმიის“ (UPA) გმირების სახელი უწოდა.პოლონეთში ამ დაჯგუფების მემკვიდრეობა დღემდე სადავოა, რაც დაკავშირებულია მისი ზოგიერთი წევრის მონაწილეობასთან ნაცისტების მიერ ოკუპირებულ დასავლეთ უკრაინაში პოლონელების მასობრივ მკვლელობებში.ევროპარლამენტის შესწორებაში, რომელიც პოლონელმა ცენტრისტმა კანონმდებელმა ანჟეი ჰალიცკიმ - პოლონეთის პრემიერ-მინისტრ დონალდ ტუსკის პარტიის წევრი - შეიტანა, აღნიშნულია: „ევროპარლამენტი წუხილს გამოთქვამს პრეზიდენტ ვოლოდიმირ ზელენსკის მიერ ბოლო დროს განხორციელებული გაუმართლებელი და პროვოკაციული ნაბიჯის გამო, რომელიც უკრაინის შეიარაღებული ძალების ელიტური სამხედრო დანაყოფისთვის „უკრაინის მეამბოხეთა არმიის“ სახელის დარქმევას გულისხმობს“.შესწორებაში ნათქვამია, რომ ევროპარლამენტი „წუხილს გამოთქვამს პოლონური მხარის მგრძნობელობისა და იმ მწუხარების უგულებელყოფის გამო, რომელიც UPA-ს მიერ მოკლული ათობით ათასი მსხვერპლის ოჯახებს უკავშირდება, განსაკუთრებით იმ ფონზე, თუ რამდენად მტკიცედ უჭერს მხარს პოლონეთი უკრაინას რუსული აგრესიის წინააღმდეგ ბრძოლაში“.საბოლოოდ, შესწორებაში, რომელსაც მხარი აბსოლუტური უმრავლესობით - 592 ხმით 42-ის წინააღმდეგ - დაუჭირეს, ნათქვამია, რომ ზელენსკის გადაწყვეტილება „არ შეესაბამება ევროპულ ღირებულებებს“.

მსოფლიო • 1783446240

უკრაინული გამოცემა The Kyiv Independent: შეშფოთება იზრდება, ვინაიდან ზელენსკი სანქციებს კრიტიკოსებისა და ყოფილი მოკავშირეების დასასჯელ ინსტრუმენტად აქცევს

7 ივლისს, როდესაც პრეზიდენტმა ვოლოდიმირ ზელენსკიმ სანქციები დაუწესა ყოფილ კანონმდებელს, ბორისლავ ბერეზას, ბევრს გაუჩნდა კითხვა: რა აკავშირებდა მას რუსეთთან ან რა საფრთხეს უქმნიდა ის უკრაინის ეროვნულ უსაფრთხოებას, თუ საერთოდ აკავშირებდა რამე? - წერს უკრაინული გამოცემა The Kyiv Independent.ბერეზას საჯაროდ არასდროს გამოუხატავს რუსეთისადმი რაიმე სახის სიმპათია და მთელი თავისი კარიერის განმავლობაში პროდასავლელ პოლიტიკოსად და ბლოგერად რჩებოდა.სანქციები, რომლებიც უკრაინამ 2014 წელს რუსეთის მიერ ომის დაწყების შემდეგ შემოიღო, თავდაპირველად ჩაფიქრებული იყო, როგორც მოსკოვთან და მის მარიონეტებთან ბრძოლის ინსტრუმენტი.ეს სანქციები აუცილებლად მიიჩნეოდა, რადგან რუსი ჩინოვნიკები და უკრაინიდან გაქცეული პრორუსული განწყობის პირები უკრაინული მართლმსაჯულებისთვის მიუწვდომელნი იყვნენ. ექსპერტები თანხმდებიან, რომ რუსეთის მოქალაქეებისა და კრემლის მოკავშირეების წინააღმდეგ დაწესებული სანქციები კვლავაც რჩება რუსული აგრესიის აღკვეთის მნიშვნელოვან მეთოდად.თუმცა, კრემლის საწინააღმდეგო სანქციების გარდა, ზელენსკი სულ უფრო ხშირად იყენებს სანქციებს უკრაინის მოქალაქეების წინააღმდეგ - ეს არის სამართლებრივად საეჭვო პრაქტიკა, რომელიც, ექსპერტების აზრით, შესაძლოა კრიტიკოსებისა და ოპონენტების დასასჯელ საშუალებად იქცეს.მათგან ბევრი არ არის პრორუსული და მათი ერთადერთი „დანაშაული“, როგორც ჩანს, ზელენსკის ადმინისტრაციისადმი ოპოზიციურ განწყობაში მდგომარეობს.

საზოგადოება • 1783439294

კობა კობალაძემ უკრაინაში დაღუპული დავით ქუქჩიშვილის ხსოვნას პატივი მიაგო

ვეტერანების საქმეთა სახელმწიფო სამსახურის დირექტორმა, გენერალ-მაიორმა კობა კობალაძემ სამსახურის წარმომადგენლებთან და ვეტერანებთან ერთად, რუსთავში, გრიგოლ ხანძთელის სახელობის ტაძარში, რუსეთ-უკრაინის ომში დაღუპული ქართველი მებრძოლის, დავით ქუქჩიშვილის ხსოვნას პატივი მიაგო და მის ოჯახსა და ახლობლებს მიუსამძიმრა.თანამებრძოლების ინფორმაციით, „ქართველი პარტიზანების“ მეთაურის, დავით ქუქჩიშვილის ავტომობილი ნაღმზე მაშინ აფეთქდა, როცა იგი დაჭრილი და დაღუპული მებრძოლების ველიდან გამოყვანას ცდილობდა.ქართველი მეომარი 26 ივნისს დაიღუპა. 49 წლის დავით ქუქჩიშვილი, აფხაზეთის ომის ვეტერანი იყო, უკრაინაში კი, რუსული აგრესიის წინააღმდეგ, 2014 წლიდან იბრძოდა.დავით ქუქჩიშვილი, დღეს, რუსთავში, სამხედრო პატივით დაკრძალეს. მსუბუქი ყოფილიყოს მისთვის ქართული მიწა! ინფორმაციისთვის, ომის დაწყების პირველივე დღეებიდან, უკრაინაში, რუსული აგრესიის წინააღმდეგ, რამდენიმე ასეული ქართველი მოხალისე იბრძვის. მოხალისეთა პირველი ნაკადი, საქართველოდან, უკრაინაში, 2022 წლის მარტის დასაწყისში წავიდა. ისინი სხვადასხვა ბატალიონში ირიცხებიან და მონაწილეობენ საომარ მოქმედებებში, ფრონტის წინა ხაზზე. უკრაინაში რუსეთის სრულმასშტაბიანი შეჭრიდან და ომის დაწყებიდან (2022 წლის 24 თებერვლიდან) დღემდე, უკრაინის ტერიტორიული მთლიანობისათვის ბრძოლაში 100-მდე ქართველი მებრძოლი დაიღუპა.