„სტატისტიკის წარმოებასაც აზრი აღარ აქვს“ - ლევან ფერაძე ამბობს, რომ „ომიკრონი“ ყველას შეხვდება

საქართველოში ბოლო დღეების განმავლობაში კორონავირუსით დაინფიცირების რეკორდულად მაღალი მაჩვენებელი ფიქსირდება. 21 იანვრის მონაცემებით, ქვეყანაში 8767 ადამიანი დაინფიცირდა.

ეპიდემიოლოგები ქვეყანაში პიკს იანვრის ბოლოს და თებერვლის დასაწყისში ელოდებიან.

ბავშვთა ქირურგი ლევან ფერაძე აცხადებს, საქართველოში „ომიკრონის“ შტამის გავრცელება კონტროლს აღარ ექვემდებარება, რის გამოც სტატისტიკის წარმოებასაც აღარ აქვს აზრი.

მისივე თქმით, „ომიკტონი“ მოსახლეობის 99%-ს შეხვდება.

„ეპიდემიოლოგიური სიტუაცია კონტროლს აღარ ექვემდებარება. მეტსაც გეტყვით, რომ სტატისტიკის წარმოებასაც საერთოდ აზრი აღარ აქვს. თუ ეს იქნება მასობრივი და მოიცავს 1-1,5 მლნ ადამიანს, გარკვეულწილად ჰოსპიტალურ სექტორს მაინც დააწვება და მზად ვართ ამისთვის თუ არა, არ ვიცი.

ამასთან, რა თქმა უნდა, კიდევ უფრო დიდი დაწოლა იქნება პირველადი ჯანდაცვის რგოლზე და რესურსი ნამდვილად არ იქნება საკმარისი.

ვფიქრობ, ყველა ჩვენგანს დავაავადდებით საბოლოო ჯამში. ალბათ, ერთეულები გადარჩებიან, 99%-ს შეგვხვდება „ომიკრონი“, – აღნიშნა ლევან ფერაძემ.

ეპიდემიოლოგები სიტუაციიდან გამოსავალს ვაქცინის ბუსტერ დოზასა და რეკომენდაციების დაცვაში ხედავენ.