საინვესტიციო გარემოს ათწლიანი პროგრესით, საქართველო მსოფლიოს საუკეთესო ათეულში მე-3 ადგილზე გავიდა - ფინანსთა სამინისტრო

საქართველო 2023 წლის „კეთილდღეობის ინდექსში“ 167 ქვეყნიდან 53-ე ადგილზეა და მსოფლიო რეიტინგში ყველა მეზობელ ქვეყანას უსწრებს, პოსტსაბჭოთა ქვეყნებიდან კი მხოლოდ ბალტიისპირეთს ჩამორჩება. ინფორმაციას ფინანსთა სამინისტრო ავრცელებს.

უწყების თანახმად, კეთილდღეობის გრძელვადიანი, 10-წლიანი გაუმჯობესების მიხედვით, საქართველო სამი მიმართულებით დასახელდა მსოფლიოს საუკეთესო ათეულებში. 2013-2023 წლებში საქართველოს სარეიტინგო მდგომარეობა მსოფლიოში 11 ადგილით გაუმჯობესდა.

როგორც ინფორმაციიდან ჩანს, დაცულობის და უსაფრთხოების რეიტინგის ათწლიანი გაუმჯობესებით საქართველო მსოფლიოს საუკეთესო ათეულში მე-3 ადგილზეა. ამ პერიოდში სარეიტინგო პოზიცია საქართველომ 46 ადგილით გაიუმჯობესა.

“საინვესტიციო გარემოს ათწლიანი პროგრესით საქართველო მსოფლიოს საუკეთესო ათეულში მე-3 ადგილზე გავიდა, პოზიციის 25 ადგილიანი წინსვლით.

საცხოვრებელი პირობების ათწლიანი გაუმჯობესებით საქართველო ასევე მსოფლიოს საუკეთესო ათეულში მე-3 ადგილზეა. ამ პერიოდში საქართველოს რეიტინგი 19 პოზიციით გაუმჯობესდა“, – აღნიშნულია ფინანსთა სამინისტროს მიერ გავრცელებულ ინფორმაციაში.

უწყების ცნობით, „კეთილდღეობის ინდექსს“ და შესაბამის ანგარიშს ბრიტანეთის მოწინავე ანალიტიკური ცენტრი Legatum Institute 2007 წლიდან აქვეყნებს. ორგანიზაცია გლობალურ კეთილდღეობას 12 აგრეგატის მიხედვით აფასებს:

დაცულობა და უსაფრთხოება; პერსონალური თავისუფლება; მმართველობა;

სოციალური კაპიტალი; საინვესტიციო გარემო; სამეწარმეო კონდიცია; ბაზარზე წვდომა და ინფრასტრუქტურა; ეკონომიკის ხარისხი; საცხოვრებელი პირობები;

ჯანმრთელობა; განათლება; ბუნებრივი გარემო (ეკოლოგია).

იხილეთ ბმულები:

https://li.com/reports/2023-legatum-prosperity-index/

https://www.prosperity.com/“, – აღნიშნულია ფინანსთა სამინისტროს მიერ გავრცელებულ ინფორმაციაში.