რა მარკეტინგულ ხრიკს მიმართავენ კომპანიები, როცა ფასებს „პირადში გწერენ“ – ნახეთ, რა გათვლა ხდება ამ დროს

„რა ღირს?“  – პირადში მოგწერთ“ – ეს ის აქტუალური ფრაზებია, რომლებსაც ინტერნეტსივრცეში მოწონებულ პროდუქტთან დაკავშირებით ხშირად ვაწყდებით. ბოლო დროს განსაკუთრებით, რადგან პანდემიის გამო გაყიდვების პროცესი ძირითადად, ონლაინ-სივრცეში მიმდინარეობს.

მიუხედავად იმისა, რომ მომხმარებელთა უმეტესობას კომპანიების მხრიდან აღნიშნული დამოკიდებულება აღიზიანებს, სოციალურ ქსელში ამ თემაზე მიმებიც შეიქმნა, რომელიც აქტიურად ზიარდება.

ფასების გაუმჭვირვალობასთან დაკავშირებით მომხმარებლებს სხვადასხვა ვერსია აქვს. არსებობს მოსაზრება, რომ ადამიანებს სოცქსელის ფოტოების მიხედვით უსაზღვრავენ ფასს, საქმე გვაქვს კონკურენციასთან, ანდაც, უხარისხო პროდუქტთან. თუმცა ფაქტია, რომ ეს მარკეტინგული „ხრიკი“ კომპანიისთვის ხელსაყრელია, რაც მომხმარებელს გარკვეულწილად აზიანებს კიდეც.

აღნიშნულ საკითხზე „პრაიმტაიმი“ მარკეტოლოგ კახა ჯაყელს ესაუბრა. მისი შეფასებით, ეს მარკეტინგულად არაეთიკური მეთოდია, რასაც გმობენ.

მარკეტოლოგი მოქალაქეებს ურჩევს, არ გაეკარონ იმ კომპანიებს, რომლებიც ცდილობენ გარკვეულ პრივატულ, თუნდაც ონლაინ, ან სატელეფონო კავშირებზე მათ შეტყუებას, რადგან ეს უკვე იმის წინაპირობაა, რომ რაღაც გარკვეული სიცრუე ელოდებათ.

„როდესაც მომხმარებლის კიდევ უფრო პრივატულ ზონაში შეტყუება ხდება, ამას გმობს მარკეტინგი და ნებისმიერი მარკეტინგული ეთიკა უარყოფით კონტექსტში საუბრობს. გარდა ამისა, ამ ქმედების შემდეგ იბადება შემდეგი შესაძლო კრიმინალის არსებობა.

ეს ადამიანების შემოტყუება, შემდეგ მათი გარკვეულ სარგებლის დაპირებით კიდევ უფრო მეტ სიცრუეში შეყვანაა, აქედან გამომდინარე, მარკეტინგი კრძალავს არაეთიკურ, არაგამჭვირვალე ქმედებას. მარკეტინგი კომპანიებს მოუწოდებს, მომხმარებელთან ურთიერთობისას მხოლოდ და მხოლოდ ეთიკურ და მორალურ მეთოდებს მიმართონ.

არსებობენ კომპანიები, რომლებიც პირველ რიგში, კლიკზე არიან ორიენტირებულები. ისინი ცდილობენ შემოგიტყუონ გარკვეულ სფეროში, რომ მისწერო. სტატისტიკურად წინასწარ აქვთ დათვლილი, მაგალითად, რამდენად ეფექტურია მათი ქმედება, თუ 1 000 კაცს დაელაპარაკე აქედან 700-მა მისწერა წერილი, ამას უკვე თვლიან, რომ მათი მხრიდან წარმატებაა.

გამოდის, რომ 70%-იანი წარმატება აქვთ. შემდეგ ამას თავიანთი ლოგიკური ფორმულით დადასტურებული რეზულტატი აქვს, თუ 1 000-დან 700 უკვე პირადში გამოგეხმაურა, იქიდან დაახლოებით, 30% შეიძენს პროდუქციას. მათთვის ადამიანის შეტყუება ძალიან სერიოზული ფსიქოლოგიური გავლენის მნიშვნელოვანი მამოძრავებელი ძალაა. ისინი ამას არ უნდა აკეთებდნენ და აცხადებდნენ, “პირადში მოგწერთო“. მომხმარებელი თავისუფალია, მას თუ უნდა მისწერს, არ სჭირდება მითითება.

აქედან გამომდინარე, ამ გზით ითვლიან თავიანთი გაყიდვების საბოლოო ოდენობას. ცნობილი ფაქტია, რომ თუ გარკვეული რაოდენობა ინფორმირებული მომხმარებლიდან, ვთქვათ, 50%-ზე ახდენენ გავლენას, იქიდან 25% საბოლოოდ პროდუქტს იძენს“, – ამბობს კახა ჯაყელი „პრაიმტაიმთან“ საუბრისას.