რა ანალიზები უნდა ჩაიტაროთ თუკი ფიქრობთ, რომ აფლატოქსინის შემცველი პროდუქტები მიიღეთ?

რა ანალიზები უნდა ჩაიტაროს პაციენტმა თუკი ფიქრობს, რომ აფლატოქსინის შემცველი პროდუქტები მიიღო? - ამ კითხვით ექიმ-ტოქსიკოლოგს, მედიცინის აკადემიურ დოქტორს, ეკა ქურდაძეს მივმართეთ. 

„მსგავსი სახის ანალიზები, რომელიც დაადგენს, იღებდა თუ არა პაციენტი აფლატოქსინის შემცველ პროდუქტებს, საქართველოში არ ტარდება. საზღვარგარეთ ანალიზების გადაგზავნა ძალიან დიდ თანხებთან არის დაკავშირებული. ღვიძლის ფუნქციების ანალიზი რომ ჩატარდეს, ამაზე ექიმმა უნდა მიიტანოს ეჭვი, რომ პაციენტს სჭირდება. შესაბამისი ჩვენება უნდა არსებობდეს ამ კუთხით. ბევრი მიზეზია, რამაც შეიძლება ღვიძლის ფუნქციები შეცვალოს. კონკრეტულად, უკავშირდება თუ არა პრობლემა აფლატოქსინს, თუ სხვა ტოქსინს — ეს ექიმმა უნდა გადაწყვიტოს.

ბუნებაში არსებობს უამრავი ტოქსინი — ლაბორატორიულად მათი რაოდენობა შეიძლება იყოს 20 ათასზე მეტი. ყველაფერზე კვლევას ვერ ჩავიტარებთ. როცა პაციენტს ჩივილი უჩნდება და ეჭვი აქვს ინტოქსიკაციაზე, უნდა მივიდეს ტოქსიკოლოგთან.

რაც გამოქვეყნდა, ეს მაჩვენებელი იმდენად მინიმალურია, რომ ორგანიზმში მის მიღებას ზემოქმედება არ უნდა ჰქონდეს. პრევენციულად ამ ტოქსინზე ანალიზის ჩატარება არ ხდება. პაციენტს უნდა ჰქონდეს ჩივილი — ტოქსინის დაგროვება ასე უბრალოდ არ ხდება.

თუ ვარკვევთ, მომავალში რამე პრობლემას ხომ არ მოგვცემს — კანცეროგენების ლაბორატორიული განსაზღვრა არ ხდება. მესმის, პანიკაა, მაგრამ ეს ინფორმაციის არ ქონის გამო ხდება,“ — ამბობს ექიმი ტოქსიკოლოგი ეკა ქურდაძე.