ქუჩაში სიმღერას ვაგრძელებ, ქუჩა, რომ არა, ვერც ამ პროექტში გავიდოდი“ – საბერძნეთის The Voice–ის გამარჯვებული დოდონა ნამორაძე

საბერძნეთის მუსიკალური პროექტის The Voice–ის გამარჯვებული, დოდონა ნამორაძე ამბობს, რომ პროექტში მისი გამარჯვება უმეტეს წილად ემიგრანტების დამსახურებაა.

„ემიგრანტები თავიდან ბოლომდე გვერდით მედგნენ, მათ გამო გავიმარჯვე… ეს იყო საოცარი მუხტი, მხოლოდ ამისთვის ღირდა ჩემი იქ ყოფნა. საბერძნეთში ძალიან ბევრი ქართველია.. იყო შემთხვევაც, რომ გამომიძახებია საჭმელი, მოუტანია ქართველ კურიერს და ფული არ გამოურთმევია. ფილიპინებში გავიზარდე და ჩემს მეორე სახლად ვთვლი. იქ რომ ვცხოვრობდი ქართული მუსიკა დავიწყებული მქონდა, მაგრამ დედაჩემი ჰამლეტ გონაშვილს და გიორგი უშიკიშვილს მასმენინებდა,“- ამბობს დოდონა.

მომღერალმა ასევე აღნიშნა,  ქუჩაში სიმღერას პროექტში გამარჯვების შემდეგაც აგრძელებს.

„ქუჩა რომ არა, ვერც „ვოისში“ გავიდოდი. იქ ვისწავლე ხალხთან კომუნიკაცია და მუსიკის მიმართ ნამდვილი სიყვარული. დღესდღეობით ისევ გავდივარ ქუჩაში, კვირაში ერთხელ მშვიდობის ხიდზე. ქუჩაში მცნობს ხალხი, რადგან „ვოისში“ გამოვედი და გინდა არ გინდა თავში გივარდება ეს. ეს რომ ვიგრძენი, გადავწყვიტე, რომ ქუჩაში სიმღერა უნდა გავაგრძელო, რადგან იქ ერთ დონეზე ხარ,“ – ამბობს დოდონა ნამორაძე.