ლილოში ხანძარმა დაახლოებით 5 000მ² ფართობი გაანადგურა - ზარალის ოდენობის შეფასება დღეიდან დაიწყება

მეხანძრე-მაშველებს ლილოში გაჩენილი ხანძრის ლიკვიდაციისთვის 6 საათზე მეტი დასჭირდათ, თუმცა, ცალკეული მხრჩოლავი კერების ბოლომდე ჩასაქრობად, რამდენიმე ბრიგადა ტერიტორიაზე თითქმის მთელი ღამის განმავლობაში დარჩა.

ძლიერი ხანძრის შედეგად, არავინ დაშავებულა. დამწვარია ბაზრობის ტერიტორიის ნაწილი - დაახლოებით 5 ათასი კვადრატული მეტრი ფართობი, სადაც მაღაზიები და საწყობები იყო განლაგებული. ზარალის ოდენობის შეფასება დღეიდან დაიწყება.

რა გახდა ხანძრის მიზეზი, ჯერჯერობით დაზუსტებული არაა. ერთ-ერთი ვერსიით, ხანძარი ტერიტორიაზე შედუღების აპარატის გამოყენების დროს ერთ-ერთ მაღაზიაში გაჩნდა და მალევე გავრცელდა. ცეცხლის გაჩენის ერთ-ერთ მიზეზად სახელდება ელექტროსადენებიც. მიმდინარეობს გამოძიება.

"დიდი დაკვამლიანება შევნიშნეთ, გამოვედით გარეთ. გადავრეკეთ და მოვიდნენ სასწრაფოდ მეხანძრეები, მაგრამ ყველგან იყო უკვე ცეცხლი, ყველა ფანჯრიდან გამოდიოდა ცეცხლი. ალბათ გამოიწვია კაბელებმა", - ამბობს თვითმხილველი.

თბილისის საგანგებო სიტუაციების მართვის სამსახურის მთავარი სამმართველოს უფროსის, ლევან მუსელიანის ინფორმაციით, ხანძრის ქრობის პროცესი ნორმალურ ვითარებაში წარიმართა.

"112-ში ინფორმაციის შემოსვლისთანავე, მეხანძრე-მაშველებმა დროულად მოახდინეს რეაგირება, დროულად დაიწყეს ხანძრის ქრობა. ადგილზე მობილიზებული იყო 22 სახანძრო-სამაშველო ავტომანქანა და 120-მდე მეხანძრე-მაშველი იყო მობილიზებული, რომლებიც ჩართულები იყვნენ ხანძრის სალიკვიდაციო სამუშაოებში. დაშავებულების შესახებ ინფორმაცია არ შემოსულა", - აცხადებს ლევან მუსელიანი.