კურორტ ნაბეღლავზე გამავალი გზის რეაბილიტაცია მიმდინარეობს

საქართველოს ინფრასტრუქტურის სამინისტროს საავტომობილო გზების დეპარტამენტის ინფორმაციით, ჩოხატაური-ბახმაროს საავტომობილო გზის 1,5 კმ-იანი მონაკვეთის (კმ21-კმ22) პერიოდული შეკეთების სამუშაოები მიმდინარეობს. აღნიშნული მონაკვეთი კურორტ ნაბეღლავზე გადის.

პროექტის ფარგლებში ხორციელდება მიწის სამუშაოები, გზის სავალ ნაწილზე ასფალტ-ბეტონის საფარის დაგების და ადგილობრივ გზებთან მიერთებების მოწყობის სამუშაოები.

გატარდება უსაფრთხოების გაუმჯობესების ღონისძიებები, კერძოდ: გზის სავალი ნაწილის მონიშვნა, შემოფარგვლა და საგზაო ნიშნების მოწყობა.

ჩოხატაური-ბახმაროს გზა გაივლის კურორტ ნაბეღლავს და კურორტ ბახმარომდე მიდის. აღნიშული გზის გამართულად ფუნქციონირებას დიდი მნიშვნელობა აქვს რეგიონის განვითარებისა და ტურისტული პოტენციალის სრულად გამოყენების კუთხით.

სამუშაოები სახელმწიფო ბიუჯეტიდან  1 158 666 ლარით ფინანსდება.