რას უკავშირდება ვაკეში მოკლული ბიზნესმენის მკვლელობის საქმე - ცნობილი ხდება ახალი დეტალები

ვაკეში მოკლულ ბიზნესმენ ლევან ჯანგველაძეს რუსული „კრიმინალური სამყაროს“ რუხ კარდინალად მოიხსენიებენ.

მის სახელს უკავშირდება არაერთი „კრიმინალური ავტორიტეტის“ მკვლელობის მცდელობის ორგანიზება, მათ შორის იაპონჩიკისა და დედ ჰასანის.

ამბობენ, რომ ორგანიზატორებისთვის კრიტიკულად მნიშვნელოვანი იყო, რომ ქილერები ლევანს არა მოსკოვში არამედ, თბილისში დასხმოდნენ თავს. სწორედ ამიტომ, მის წინააღმდეგ თავდასხმის მცდელობები თბილისში მანამდეც ყოფილა.

ასეთი ხმაურიანი მკვლელობები, როგორც წესი, კანონიერ ქურდებს შორის შიდა ანგარიშსწორებაა. თუმცა, თავდასხმის შემდეგ მალევე გავრცელდა ვერსია, რომ ეს იყო შეტყობინება „კანონიერი ქურდის“, ლაშა შუშანაშვილის (რუსთავსკის) მხრიდან.

შეგახსენებთ, რომ, 14 მარტს, ჭავჭავაძის გამზირზე მოკლული ლევან ჯანგველაძე ე.წ. კანონიერი ქურდის, მერაბ ჯანგველაძის ძმაა. მკვლელობის დღეს ის ახლობლის პანაშვიდზე იმყოფებოდა. მკვლელი მას სადარბაზოსთან ჩაუსაფრდა და 10-მდე ტყვია ესროლა. დამნაშავე შემთხვევის ადგილიდან მიიმალა. გავრცელებული ინფორმაციით, "კილერს" სილიკონის ნიღაბი ეკეთა. შემთხვევის ადგილას ჩატარებული საგამოძიებო მოქმედებების შემდეგ, სამართალდამცველებმა მისი ვინაობის დადგენა მალევე შეძლეს.

მკვლელობის საქმეზე დაკავებულია გელა უძილაური.

ლევან ჯანგველაძის მკვლელობის ბრალის დადასტურების შემთხვევაში, უძილაურს 16-დან 20 წლამდე ან უვადო პატიმრობა ემუქრება. 14 მარტს, ჭავჭავაძის გამზირზე მომხდარი დანაშაულის საქმეზე საგამოძიებო მოქმედებები ამ დრომდე გრძელდება.

ამავე თემაზე წაიკითხეთ:  

თბილისში რუსული კრიმინალური სამყაროს რუხი კარდინალი მოკლეს - დაიწყება თუ არა დაპირისპირების ახალი ტალღა, მაშინ, როცა ქილერი უკვე დაკავებულია