,,გვსურს გამოვეხმაუროთ, სოციალურ ქსელში გავრცელებულ, არასრულწლოვანზე ძალადობის ამსახველ ვიდეოს" - შსს განცხადებას ავრცელებს

ქუთაისში, არასრულწლოვანის მიმართ განხორციელებული ძალადობის ფაქტზე, შინაგან საქმეთა სამინისტრომ გამოძიება 24 სექტემბერს დაიწყო. 

უწყება სოციალურ ქსელში გავრცელებულ კადრებს ეხმაურება და განცხადებას ავრცელებს. 

,,გვსურს გამოვეხმაუროთ ერთ-ერთი მედია საშუალების დამფუძნებლისა და ჟურნალისტის მიერ სოციალურ ქსელში გავრცელებულ, არასრულწლოვანის მიმართ განხორციელებულ ძალადობის ამსახველ ვიდეოს.

აღნიშნულთან დაკავშირებით, 24 სექტემბერს, შინაგან საქმეთა სამინისტროს იმერეთის, რაჭა-ლეჩხუმისა და ქვემო სვანეთის პოლიციის დეპარტამენტის ქუთაისის საქალაქო სამმართველოში დაწყებულია გამოძიება სისხლის სამართლის კოდექსის 126-ე მუხლის 1¹-ნაწილის ,,ა,, და ,,ბ,, ქვეპუნქტით.

საგამოძიებო მოქმედებების ფარგლებში არასრულწლოვანთა გამოკითხვა მოხდა მათი კანონიერი წარმომადგენლების თანდასწრებით და არასრულწლოვანთა საუკეთესო ინტერესების სრული დაცვით. იდენტიფიცირებულია საქმესთან შემხებლობაში მყოფი ყველა პირი. განხორციელებულია კანონით დადგენილი რეფერირების პროცედურა. საქმეზე გრძელდება შესაბამისი საგამოძიებო და საპროცესო მოქმედებები.

საქართველოს კანონმდებლობით, დაუშვებელია რაიმე ფორმით, საჯარო გახდეს ბავშვის პერსონალური მონაცემის შემცველი ჩანაწერი, რომელიც უკავშირდება არასრულწლოვნის მიმართ ან მის მიერ ჩადენილ ძალადობის შემთხვევას.

მოვუწოდებთ მედიის წარმომადგენლებს, განსაკუთრებული სიფრთხილით მოეკიდონ ბავშვთა პერსონალური ინფორმაციის დაცვას და იმოქმედონ არასრულწლოვანთა საუკეთესო ინტერესების გათვალისწინებით.
აქვე გვსურს აღვნიშნოთ, რომ განსაკუთრებით მაშინ, როდესაც საქმე არასრულწლოვნებს ეხება, მნიშვნელოვანია მედიის მიერ ფაქტის გადამოწმება ან მიმართვა შესაბამისი უწყებისთვის, ვიდრე საჯაროდ, სოციალურ ქსელში ან მედიაში მოხდება არასრულწლოვანთან დაკავშირებული ინფორმაციის იმგვარად გავრცელება, რამაც შესაძლოა არასრულწლოვანს დამატებით ტრავმა მიაყენოს", - ნათქვამია განცხადებაში.

ასევე ნახეთ:

ფრთხილად! ახალი თაღლითური სქემა ტელეფონის SIM ბარათის გამოყენებით

ამინდი მკვეთრად გაუარესდება - გარემოს ეროვნული სააგენტოს გაფრთხილება

,,ჩემი ტკბილხმიანი და ლამაზი გოგო აღარ არის... მომენატრები, ჩემო ვარსკვლავო..." - მომღერალ ანი ნოზაძეს ემოციურად ემშვიდობებიან