რამდენი შვილი უნდა ჰყავდეთ მშობლებს, რომ სტრესისგან განთავისუფლდნენ - აღმოჩენილი იდეალური რიცხვი

ბევრს ყოველთვის ჰგონია, რომ ერთი ან მაქსიმუმ ორი შვილის ყოლა ნიშნავს ყველაზე მშვიდ მშობლობას და ზრდის წარმატებული შვილების აღზრდის შანსს. თუმცა, ეს ასე არ არის. სამეცნიერო მეთოდებით დადგინდა, რომ ოთხშვილიანი ოჯახები ყველაზე ნაკლებ სტრესში ცხოვრობენ და ყველაზე ბედნიერებად ითვლებიან, წერს ვებგვერდი Yourtango.

გამოკითხვის შედეგად, რომელიც ამერიკულმა გამოცემამ TODAY ჩაატარა 7 ათას ამერიკელ დედას შორის, გაირკვა, რომ სამი შვილის დედები უფრო დიდ სტრესს განიცდიან, ვიდრე ისინი, ვისაც ოთხი შვილი ჰყავთ. ფსიქიატრმა და ოთხი შვილის დედამ, დოქტორმა ჯანეტ ტეილორმა ეს ახსნა იმით, რომ ქალებს უბრალოდ აღარ რჩებათ რესურსი იმისთვის, რომ მეტად ინერვიულონ.

კვლევამ ასევე აჩვენა, რომ მრავალშვილიანი დედები  ნაკლებად აქცევენ ყურადღებას საზოგადოებრივი აზრის გავლენას — და სწორედ ესაა სტრესის მთავარი წყარო. სხვა სიტყვებით, ისინი თავის თავს უფლებას აძლევენ, რომ აღარ იყვნენ იდეალურები.

კომენტარს აკეთებს ოჰაიოს შტატის უნივერსიტეტის ფსიქოლოგიის კათედრის წარმომადგენელი, სარა შოპე-სალივანი, რომელიც აღნიშნავს, რომ საზოგადოება ზეწოლას ახდენს დედებზე და აიძულებს მათ ე.წ. „ინტენსიური დედობისკენ“.

„ეს ნიშნავს, რომ დედობა უნდა იყოს შრომატევადი, ემოციურად ამომწურავი და ეფუძნებოდეს ექსპერტების რჩევებს,“ — წერს ის მოხსენებაში, რომელიც თანამედროვე ოჯახების საბჭოსთვის იყო მომზადებული.

თუმცა ასეთი მიდგომა საპირისპირო შედეგს იძლევა. სრულყოფილებისკენ სწრაფვაში სტრესი კიდევ უფრო მძაფრდება, თუ ოჯახს ფინანსური სირთულეები აქვს ან მშობლებს არ შეუძლიათ სამუშაოსა და შვილებზე ზრუნვას შორის ბალანსის დაცვა. საბოლოოდ, ეს ყველაფერი ემუქრება მათ ემოციურ ამოწურვას და სრული გადატვირთვის მდგომარეობამდე მიჰყავს.

სტატიის ავტორების აზრით, სტრესისგან განთავისუფლების რეცეპტი — კიდევ მეტი შვილია. მიუხედავად იმისა, რომ ეს თავდაპირველად არალოგიკურად ჟღერს, მიზეზი მარტივია: რაც მეტი შვილი ჰყავთ მშობლებს, მით ნაკლები დრო და ენერგია რჩებათ თითოეული ბავშვის ზედმიწევნით აღზრდაზე.

ოთხი შვილის მშობლები უბრალოდ ატარებენ დროს ოჯახთან ერთად, ნაკლებად ღელავენ სრულყოფილებაზე და შედეგად ხდებიან უფრო მშვიდები, თავდაჯერებულები და, რაც მთავარია — ბედნიერები.