ცვლილებები, რომლებიც მაისიდან ამოქმედდება - ვის დაეკისრება ფულადი სანქციები
1745781273
უგულავამ დაიბარა „ჟინერის“ დირექტორი და იძულების წესით მოაწერინეს ხელი იმის შესახებ, რომ უარს ამბობდა სასამართლოში სარჩელზე, რომლის იმედიც გვქონდა, რაღაც პოზიციები უნდა აღგვედგინა, – ამის შესახებ 1998-1999 წლებში „ჟინერის“ სამეთვალყურეო საბჭოს თავმჯდომარემ, თეიმურაზ ჭიჭინაძემ „2003-2012 წლებში მოქმედი რეჟიმისა და რეჟიმის პოლიტიკური თანამდებობის პირების საქმიანობის შემსწავლელი დროებითი საგამოძიებო კომისიის“ სხდომაზე განაცხადა.
მისივე თქმით, „უგულავას „ჟინერის“ დირექტორი მთელი დღე ჰყავდა დაკავებული თავის კაბინეტში და ბოლოს იძულებყლი გახადეს, ხელიმ მოწერა“.
„ჩვენ გვქონდა ერთი ისეთი სარჩელი სასამართლოში, რომლის იმედზეც ვიყავით. ალბათ, ეს სარჩელი დაკმაყოფილდებოდა და ყველაფერი ჩაეყრებოდათ წყალში. ეტყობა, სერიოზული დავალება ჰქონდა, „ჟინერი“ ბოლომდე წაეღოთ და პირველი, რაც უგულავამ გააკეთა, წყალკანალის უფროსად მოიყვანა ვინმე გეგი ქელბაქიანი და გაუშვა სერიოზული პროფესიონალი ცარციძე. ჩვენ იურიდიული კომპანია გვემსახურებოდა, რომლის იურისტები შემდეგ უგულავამ გამოიყენა, ერთი თავისთან წაიყვანა ქონების მართვის სამმართველოს უფროსად, მეორე კი გამოუშვა ჩვენთან სამეთვალყურეო საბჭოს წევრად. ამ იურიდიულ კომპანიას ვალდებულება ჰქონდა, ათი წლის განმავლობაში რაც არ უნდა მომხდარიყო, ჩვენგან არავითარი ინფორმაცია გარეთ არ გასულიყო. გამოიყენა რა ეს ხალხი, ალაფიშვილი და ყავლაშვილი, მოხდა „შემოსევა“. ორი დღით წავედი შვეიცარიაში, „ჟინერმა“ კიდევ ერთი ჯილდო მიიღო. ამ დროს „ჟინერის“ დირექტორი ჩაჩხიანი დაუბარებია უგულავას და სასამართლოში შეტანილ სარჩელზე უარის თქმა მოსთხოვა. ჩაჩხიანს არ ჰქონდა უფლება და წავიდა უარზე. მას არ ჰქონდა უფლება, ჩვენ გარეშე მოეწერა ხელი ამაზე. უგულავას მთელი დღე ჰყავდა დაკავებული თავის კაბინეტში, ბევრი რამ მოიგონა, ბლანკი არ მაქვს და ასე შემდეგ. ბოლოს, იძულებული გახადეს, დაერეკა ერთ-ერთი ჩვენი პარტნიორისთვის, ალეკო კობაიძისთვის, რომელსაც ჟინვალიდან ჩამოატანინეს ბლანკი. ეს უკვე ღამე ხდება და იძულების წესით, მოაწერინეს ხელი იმის შესახებ, რომ უარს ამბობდა სასამართლო პროცესზე, რომლის იმედიც გვქონდა, რაღაც პოზიციები უნდა აღგვედგინა“, – განაცხადა ჭიჭინაძემ.
როგორც თეიმურაზ ჭიჭინაძემ კომისიის სხდომაზე აღნიშნა, კომპანიის პარტნიორები და ინვესტორები დაზარალდნენ, ვინაიდან მათი მრავალმილიონიანი ქონება კონკრეტულმა ჯგუფმა გადაინაწილა. ჭიჭინაძის თქმით, წინა ხელისუფლების მთავარი ამოცანა იყო წყლის ტარიფის გაძვირება.
„ჩაატარეს კრება, ხალხი, რომელიც ვახსენე, შემოვიდნენ სამეთვალყურეო საბჭოში. მათი მიზანი იყო, გაეკოტრებინათ და გაეუქმებინათ კომპანია, რათა შემდეგ არანაირი პრეტენზიის წამოყენების უფლება არ გვქონოდა. გააკოტრეს და მთელი ამ ქონების, ჩვენი ნაშრომის, ნაწვალების, მრავალმილიონიანი ქონების გადანაწილება მოხდა. ამ ჰესის გარდა, გვქონდა ძალიან ბევრი რამ, დმანისში კიდევ მეორე ჰესი და ყველაფერი გადაინაწილა ამ ჯგუფმა. ყველაზე მნიშვნელოვანია, რომ ჰესი წაიღეს და ჩვენ – პარტნიორებმა, ინვესტორებმა ვიზარალეთ. მათი მთავარი ამოცანა იყო, წყლის ტარიფი გაეძვირებინათ, რასაც ჩვენს პირობებში ვერ ახერხებდნენ, რადგან დაბალი იყო ენერგიის ტარიფი, წყალი უფასო და ვერაფრით ახერხებდნენ. როგორც კი ეს გაკეთდა, მოგეხსენებათ, კატასტროფულად გაიზარდა ფასი, მძიმე ტვირთად დააწვა საქართველოს მოსახლეობას და დღესაც იხდის. პარადოქსია, რომ ყველაზე იაფი ნედლეული, რომელიც საქართველოშია, დღეს ყველაზე ძვირი ღირს“, – განაცხადა თეიმურაზ ჭიჭინაძემ.