შალვა პაპუაშვილი: ყოველთვის, როდესაც ევროკავშირის პრესსპიკერი ქართველი ხალხისა და არჩეული ხელისუფლების მიმართ რუსული ეპითეტებით ჟონგლიორობას დაიწყებს, მიიღებს მკაფიო პასუხს

საზოგადოებას კიდევ ერთხელ შევახსენებ, ევროკავშირის პრესსპიკერმა მხარი დაუჭირა ხელისუფლების დამხობის მიზნით დაორგანიზებულ შეკრებას 4 ოქტომბერს, რომელიც 23 სექტემბერს გააკეთა, – ამის შესახებ პარლამენტის თავმჯდომარემ, შალვა პაპუაშვილმა განაცხადა.

მისი თქმით, აღნიშნული განცხადებიდან 10 დღის განმავლობაში მოუწოდებდა, განემარტათ, გამიჯვნოდნენ დამხობის შეკრებას, თუმცა რეაგირება იყო ნული.

„დადგა 4 ოქტომბერი, დაიწყო დამხობა, რომელიც ჩავარდა და ახლა არ უნდათ პასუხისმგებლობის გაზიარება. მანამდე ვამბობდი, თუ იქნებოდა ძალადობა, ევროკომისია გაიზიარებდა პასუხისმგებლობას ამ ძალადობისთვის სწორედ პრესსპიკერის განცხადების გამო, ეს ერთი. მეორე, ჩვენ ვხედავთ, უკვე ორჯერ გააკეთა 4 ოქტომბრის წარუმატებელი დამხობის შემდეგ კომენტარი პრესსპიკერმა და ორივეჯერ თავს დაესხა საქართველოს ხელისუფლებას. ნაცვლად იმისა, რომ დაეგმო მოძალადეების და პრეზიდენტის სასახლის შტურმით ამღებების ქმედება. ეს არის უსუსური მცდელობა, რომ გაექცეს ეს ადამიანი პასუხისმგებლობას იმისთვის, რაც გააკეთა. კერძოდ, ის, რომ შეაგულიანა და გარე მხარდაჭერა გამოუცხადა 4 ოქტომბერს დაგეგმილ ხელისუფლების დამხობის შეკრებას“, – განაცხადა შალვა პაპუაშვილმა.

მისი თქმით, მსგავსი განცხადებები ქართველ ხალხზე და მის ხელისუფლებაზე სიტყვიერი თავდასხმის მაგალითია, რაც უნდა დასრულდეს.

„წარმოუდგენელია, რომ ჩვენ ვისმენთ ერთი ბიუროკრატის მხრიდან, რომელიც არავის მიერ არ არის არჩეული და არის დანიშნული საკუთარი ხელმძღვანელობის მხრიდან, ვისმენდეთ არაარჩეული ბიუროკრატის მხრიდან თავდასხმას ქართველი ხალხის არჩეულ ხელისუფლებაზე. აქ ზედმეტია საუბარი საერთოდ რაღაც ევროპულ სტანდარტებზე, ეს არის უბრალოდ მიუღებელი, როდესაც არაარჩეული ბიუროკრატი თავს ესხმის სხვა ქვეყნის დემოკრატიულად არჩეულ ხელისუფლებას. და, მესამე, პრესსპიკერი ძალიან გაიტაცა შედარება, თუ რაღაც მითითებები რუსულ სახელმძღვანელოზე, სპეცსამსახურებზე და ა.შ. აბსოლუტურად მდაბიო პროპაგანდაა, რასაც ის ეწევა. პროპაგანდას რომ ეწევა გასაგებია, მაგრამ პროპაგანდასაც რაღაც თავისი სტილი ხომ უნდა ჰქონდეს. აბსოლუტურად მდაბიო პროპაგანდა ქართველი ხალხის მიმართ, ეთნიკური ეპითეტების გამოყენებისა და ხან რუსული სახელმძღვანელო, ხან რას ამბობს და ხან რას ეს ადამიანი. ეს მიუღებელია, გუშინაც დავწერე და დღესაც მინდა, ვთქვა, ყოველ ჯერზე, როდესაც ის გამოჩნდება ქართველი ხალხის და მისი არჩეული ხელისუფლების მიმართ რუსული ეპითეტებით ჟონგლიორობას დაიწყებს, ყოველ ჯერზე მიიღებს საკმაოდ მკაფიო პასუხს ჩვენგან, ვინაიდან შეუძლებელია, რომ ასეთი მიდგომები ქართველმა ხალხმა მოითმინოს, როდესაც მას აბსოლუტურად არაფრად აგდებენ და, ასე ზემოდან ყურებით გამოდის ერთი ბიუროკრატი, რომელმაც კარიერა ახლახანს დაიწყო სავარაუდოდ იქ, გამოდის ერთი ბიუროკრატი და თავს ესხმის ქართველ ხალხს და მის არჩეულ ხელისუფლებას“, – განაცხადა შალვა პაპაუშვილმა.