შალვა პაპუაშვილი ოპოზიციის აქციაზე წაკითხულ წერილზე: კიდევ ერთხელ დადასტურდა თუ რა დონეზე იმართება რადიკალიზმი საქართველოში. ეს არის პირდაპირი ხელით მართვა პროცესებისა გარედან, სადაც თითოეული სიტყვა წინასწარ ნაკარნახევია

„კიდევ ერთხელ დადასტურდა თუ რა დონეზე იმართება რადიკალიზმი საქართველოში. ეს არის პირდაპირი ყოველდღიური ხელით მართვა პროცესებისა გარედან, სადაც თითოეული სიტყვა წინასწარ ნაკარნახევია, თითოეული ნაბიჯი გათვლილია და ასე მოქმედებენ დღეს, რადიკალური ოპოზიცია და გარედან დაქირავებული „ენჯეოები“, - განაცხადა საქართველოს პარლამენტის თავმჯდომარემ, შალვა პაპუაშვილმა წერილთან დაკავშირებით, რომელიც რადიკალური ოპოზიციის აქციაზე წაიკითხეს და რომელიც ბრიუსელიდან გამოგზავნილი ტექსტს იმეორებდა.

მისი თქმით, სამარცხვინოა, როდესაც 21-ე საუკუნის საქართველოში მარიონეტები იმართებიან გარედან.

„სამარცხვინო ფაქტია. თუ რასთან გვაქვს საქმე 21-ე საუკუნის საქართველოში, დამოუკიდებლობის აღდგენიდან 35 წლის თავზე, ჩვენ გვყავს ჩვეულებრივი მარიონეტები ქართული გვარ-სახელებით და პასპორტებით, რომლებიც იმართებიან გარედა იმისთვის, რომ დააზიანონ საკუთარი ქვეყანა. ასე უნდა შეხედოს ქართულმა საზოგადოებამ ამ მარიონეტების ჯგუფს, რომ მათი ერთადერთი მიზანი არის, რომ ჩვენი ქვეყანა ჩააბარონ პირდაპირ სხვებს სამართავად“, - განაცხადა შალვა პაპუაშვილმა.

ოპოზიციის ლიდერები ბრიუსელიდან გამოგზავნილი ბრიფინგის ტექსტის შედგენას ერთმანეთს აბრალებენ.

Prime Time-ის ინფორმაციით, ბრიუსელიდან მათ მიაწოდეს დოკუმენტი, რომელიც ადგილობრივ ოპოზიციას ევროკავშირის კონკრეტულმა მაღალჩინოსნებმა გაუგზავნეს. აცხადებდნენ, რომ აღნიშნულ ტექსტს რამდენიმე წუთში რადიკალური ოპოზიციის წარმომადგენლები უცვლელად წაიკითხავდნენ.

ამასთან, რამდენიმე წუთის შემდეგ პარლამენტთან ჩატარდა რადიკალური ოპოზიციის ბრიფინგი, რომელზეც აქციის ერთ-ერთმა ორგანიზატორმა, ლევან ჯობავამ აღნიშნული ტექსტი წაიკითხა და აღნიშნა, რომ მას სამოქალაქო ორგანიზაციების, საპროტესტო ჯგუფების, პოლიტიკური პარტიებისა და პოლიტპატიმრების წარმომადგენლების სახელით კითხულობდა.