"საბოლოო გადაწყვეტილება ჩვენს მიერ მიღებული იქნება მაშინ, როდესაც იქნება შესაბამისი დრო" - გიორგი შარაშიძე გახარიას პარტიის არჩევნებში მონაწილეობაზე

ადგილობრივი თვითმმართველობის არჩევნებამდე ზუსტად 6 თვე რჩება. "ქართული ოცნება" წინასაარჩევნო პროცესის დაწყებას უახლოეს მომავალში გეგმავს. ოპოზიციაში კი კვლავ აზრთა სხვადასხვაობაა. ხელისუფლების ოპონენტების ნაწილს ჯერ არ გადაუწყვეტია მიიღებს, თუ არაა მონაწილეობას თვითმმართველობის არჩევნებში. ნაწილი კი ამბობს, რომ მათ მკაფიო პოზიცია ამ საკითხზე უკვე ჩამოაყალიბეს და საზოგადოებას აცნობეს.

"ერთობას არ აქვს ალტერნატივა და აუცილებელია, რომ პოლიტიკური საკითხები გადაწყდეს მაგიდის გარშემო. აუცილებელია შეიქმნას სინერგიის ცენტრი, აუცილებელია რომ ეს ცენტრი ემსახურებოდეს ქვეყნის ინტერესებს," - აღნიშნა "ძლიერი საქართველოს" წევრმა, ლანა გალდავამ.

"ჩვენ და კიდევ კოალიციამ "ცვლილებებისთვის" ძალიან მკაფიო პოზიცია დავაფიქსირეთ, არჩევნებში ამ ვითარებაში მონაწილეობის გამორიცხვასთან დაკავშირებით. დანარჩენი პოლიტიკური ორგანიზაციების მხრიდან ასეთი მკაფიო პოზიცია არ იყო დაფიქსირებული," - განაცხადა "ერთობა - ნაციონალური მოძრაობის" წევრმა, ლევან სანიკიძემ.

"ჩვენ მივიჩნევთ, რომ ამ საკითხზე დისკუსიები, როგორც მინიმუმ დროებით უნდა შეჩერდეს. საბოლოო გადაწყვეტილება ჩვენს მიერ მიღებული იქნება მაშინ, როდესაც იქნება შესაბამისი დრო," - აღნიშნა "გახარია საქართველოსთვის" წევრმა, გიორგი შარაშიძემ.