როგორც ჩანს, ოპოზიციაში ახლა ყველა ცდილობს, სამომავლოდ თავისი ახალი როლი და ფუნქცია მოძებნოს, ოპოზიციის ერთიანობა რომ ტყუილია, გუშინ კიდევ ერთხელ დადასტურდა - ვლადიმერ ბოჟაძე

ვადაგასულ პრეზიდენტს იგივე გამოუვა, რაც აქამდე გამოუვიდა აქციებზე დგომით თუ აქციებზე სიარულით, გუშინ ჩვენ ვიხილეთ სალომე ზურაბიშვილის ტექსტი, რომელიც ისტორიის მიმოხილვა იყო და ოპოზიციის ერთიანობის ნაცვლად მათივე მომხრეებშიც გარკვეული გაუგებრობა გამოიწვია, – ამის შესახებ „ქართული ოცნების“ წევრმა, ვლადიმერ ბოჟაძემ განაცხადა.

ბოჟაძის თქმით, ოპოზიციის ერთიანობა მოჩვენებითი იყო.

„ისინი მოქალაქეებს წინასაარჩევნო პერიოდშიც ატყუებდნენ, რომ შეძლებდნენ გაერთიანებას, თუნდაც ერთიან მმართველობას, კოალიციურ მთავრობას ჩამოაყალიბებდნენ და ა.შ. რა თქმა უნდა იგივე გრძელდება არჩევნების შემდეგაც. რა პლატფორმაც არ უნდა ჩამოაყალიბონ, ერთად იქნებიან თუ ცალ-ცალკე, ამას ჩვენთვის არსებითი მნიშვნელობა არ აქვს. ისინი განწირულები არიან წარუმატებლობისთვის. ნებისმიერ შემთხვევაში, ისინი არიან კოლექტიური „ნაციონალური მოძრაობა“ და რადიკალური დაჯგუფება, რომელიც ებრძვის სახელმწიფოს და ხალხის ინტერესებს. ამ ქვეყანაში არეულობით, დესტაბილიზაციით, ქაოსით და მაიდნის სცენარით ხელისუფლება არ და ვერ შეიცვლება. ოპოზიციის გაერთიანება თავიდანვე მოჩვენებითი და ამომრჩევლის შეცდომაში შეყვანის მცდელობა იყო. იმის გამო, რომ მათი მოლოდინები არ გამართლდა მაიდანიზაციასთან და არეულობასთან დაკავშირებით, ახლა, როგორც ჩანს, ყველა ცდილობს, სამომავლოდ თავისი ახალი როლი და ფუნქცია მოძებნოს. ოპოზიციის ერთიანობა რომ ტყუილია, ეს გუშინ კიდევ ერთხელ დადასტურდა“, – განაცხადა ბოჟაძემ.