ქსავიე ბატელი: საქართველოს არჩეული აქვს ევროპული მომავალი. არჩევნები კარგად თუ ჩატარდა, შედეგებს პატივი უნდა ვცეთ, მე არ მაქვს მტკიცებულება, რომ არჩევნები სამართლიანი არ ყოფილა

საქართველო ახლოს იყო ევროპულ გზასთან და ახლა ვხედავ, რომ ისინი დისტანცირდებიან, – ამის შესახებ ლუქსემბურგის საგარეო საქმეთა მინისტრმა, ქსავიე ბატელიმ ლუქსემბურგში, ევროკავშირის საგარეო საქმეთა მინისტრების შეხვედრის დაწყებამდე საქართველოსთან დაკავშირებით საუბრისას განაცხადა.

„ეს სამწუხაროა. ისიც კი მოვისმინე, რომ არჩევნები იყო რთული. მე არ ვარ რომელიმე მაკონტროლებელი საბჭოს ან ორგანოს წევრი, თუმცა მოვისმინე, რომ ხალხი ახლა ძალიან უკმაყოფილოა. არჩევნები კარგად თუ ჩატარდა, შედეგებს პატივი უნდა ვცეთ. თუ არა, მაშინ უნდა ვნახოთ, რისი გაკეთება შეიძლება. საქართველოს არჩეული აქვს ევროპული მომავალი, ახლა მე არ მაქვს მტკიცებულება, რომ არჩევნები სამართლიანი არ ყოფილა. თუ ეს ასე არ არის, ჩვენ უნდა განვიხილოთ ეს. და კიდევ, სამწუხაროა, თუ ისინი დაშორდებიან ევროპას, ისინი ახლოს იყვნენ ევროპასთან“,- განაცხადა ქსავიე ბატელიმ.

ცნობისთვის, ლუქსემბურგში ევროკავშირის საგარეო საქმეთა მინისტრების საბჭოს შეხვედრა მიმდინარეობს. შეხვედრას ხელმძღვანელობს საგარეო და უსაფრთხოების საკითხებში ევროკავშირის უმაღლესი წარმომადგენელი კაია კალასი. შეხვედრაზე ევროკავშირის ქვეყნების საგარეო საქმეთა მინისტრების მთავარი განხილვის საკითხი უკრაინის წინააღმდეგ რუსული აგრესია, მოლდოვა, ინდოეთისა და წყნარი ოკეანის რეგიონის ევროკავშირთან ურთიერთობა და სუდანში არსებული ვითარებაც არის.

შეხვედრის ბოლოს გაიმართება პრესკონფერენციაც, რომელიც თბილისის დროით, 16:45 საათზეა ჩანიშნული.