პაატა შავიშვილი: მოსახლეობის აღწერის საბოლოო და უფრო დეტალური შედეგები მიმდინარე წლის ივნისში გამოქვეყნდება

მოსახლეობის და სასოფლო-სამეურნეო აღწერა 2024 წლის ნოემბერ-დეკემბრის პერიოდში ჩატარდა, 2025 წლის ივნისის ბოლოს გამოქვეყნდა წინასწარი მონაცემები, რომლის შედეგადაც საქართველოს მოსახლეობის რაოდენობამ შეადგინა 3 914 000 ადამიანი, – ამის შესახებ საქსტატის აღმასრულებელი დირექტორის მოადგილემ, პაატა შავიშვილმა განაცხადა.

მისი თქმით, წელს, აპრილის ბოლოსკენ გამოქვეყნდება მოსახლეობის სქესობრივ-ასაკობრივი შემადგენლობა მუნიციპალიტეტების და რეგიონების დონეზე, ხოლო 2026 წლის ივნისის ბოლოს გამოქვეყნდება სხვა დანარჩენი ინფორმაცია.

„მონაცემები გამოქვეყნდა ქალაქის, სოფლის, მუნუციპალურ ჭრილში, თუმცა ეს იყო წინასწარი მონაცემები. წელს, აპრილის ბოლოსკენ გამოქვეყნდება მოსახლეობის სქესობრივ-ასაკობრივი შემადგენლობა მუნიციპალიტეტების და რეგიონების დონეზე, ხოლო 2026 წლის ივნისის ბოლოს გამოქვეყნდება სხვა დანარჩენი ინფორმაცია, რომელიც ეხება მოსახლეობის ეროვნებას, განათლებას, ქორწინებით მდგომარეობას, დასაქმება-უმუშევრობის შესახებ ინფორმაციას. ამასთან ერთად გამოქვეყნდება მონაცემები მოსახლეობის საბინაო პირობების შესახებ და რაც მთავარია, გამოქვეყნდება მონაცემები სასოფლო-სამეურნეო აღწერის შედახებ, რომელიც მოიცავს მიწის ფართობს, პირუტყვისა და ფრინველის რაოდენობას და ა.შ.“, – განაცხადა პაატა შავიშვილმა.

მისი თქმით, აღწერის ისტორიაში პირველად იყო 100-პრიცენტიანი დიგიტალიზაციის პროცესი.

„ჩვენ მონაცემები არ შეგვიგროვებია ქაღალდის კითხვარის მეშვეობით. პროცესი იყო ორ ნაწილად განაწილებული. პირველ ეტაპზე განხორციელდა თვითრეგისტრაცია მოსახლეობის მიერ და შემდგომში უკვე ჩვენმა ინტერვიუერებმა პლანშეტების გამოყენებით ჩაატარეს კარდაკარ აღწერა. ამასთან ერთად, ჩვენ გამოვიყენეთ ადმინისტრაციული წყაროები გარკვეული მონაცემების შესავსებად და დარწმუნებულები ვართ, რომ მონაცემები წარმოადგენს 100-პროცენტიან სიზუსტეს, რადგან გადადარდა სხვადასხვა წყაროებს მონაცემები“, – განაცხადა პაატა შავიშვილმა