ორი მთავარი მიზეზი, რის გამოც გვსაყვედურობენ, არის მშვიდობის შენარჩუნება ჩვენს ქვეყანაში და ლგბტ პროპაგანდის წინააღმდეგ მიღებული კანონმდებლობა - ამ მხრივ ჩვენი ინტერესები ტრამპის ინტერესებთან თანხვედრაშია - ბოჟაძე

აშშ-ის არჩეული პრეზიდენტის დონალდ ტრამპის ინაუგურაციის შემდეგ ჩვენ ველოდებით ქართულ-ამერიკული ურთიერთობების თვისობრივად გადატვირთვას, - ამის შესახებ მედიასთან საპარლამენტო უმრავლესობის წევრმა ვლადიმერ ბოჟაძემ განაცხადა.

მისი თქმით, არსებობს ორი მთავარი მიზეზი, რის გამოც საქართველოს მთავრობას აკრიტიკებენ. ესენია ქვეყანაში მშვიდობის შენარჩუნება და ლგბტ პროპაგანდის აკრძალვა. ამ მხრივ კი მმართველი გუნდის ინტერესები ტრამპის ინტერესებთან თანხვედრაშია.

„ინაუგურაციის შემდეგ ჩვენ ველოდებით ქართულ-ამერიკული ურთიერთობების თვისობრივად გადატვირთვას, მით უმეტეს იმ ფონზე, როდესაც დამარცხებული ადმინისტრაცია ყველაფერს აკეთებდა იმისთვის, რომ მაქსიმალურად მძიმე მემკვიდრეობა დაეტოვებინა.

თქვენ იცით ორი მთავარი მიზეზი, რის გამოც გვსაყვედურობენ უკანასკნელი წლების განმავლობაში - ეს არის მშვიდობის შენარჩუნება ჩვენს ქვეყანაში და ასევე ლგბტ პროპაგანდის წინააღმდეგ მიღებული კანონმდებლობა. თქვენ იცით, რომ ტრამპის მთავარი ამოცანა არის სწორედ მშვიდობის შენარჩუნება მთელ მსოფლიოში. აქ ჩვენი ინტერესები თანხვედრაშია. ასევე, იცით, რომ კონგრესში უკვე დარეგისტრირდა კანონპროექტი, რომელიც განსაზღვრავს მხოლოდ ორი სქესის არსებობას და ასევე, აიკრძალება ლგბტ პროპაგანდა მთელი ქვეყნის მასშტაბით“, - განაცხადა ვლადიმერ ბოჟაძემ.