ოპოზიციაში აურზაურია, ერთმანეთს ეჯიბრებიან, სალომე ზურაბიშვილი იქნება მეთაური თუ ელენე ხოშტარია, ამას არავითარი მნიშვნელობა არ აქვს - გია ვოლსკი

ოპოზიციაში აურზაურია, სალომე ზურაბიშვილი იქნება მეთაური თუ ელენე ხოშტარია, ამას არავითარი მნიშვნელობა არ აქვს, – ამის შესახებ პარლამენტის პირველმა ვიცე-სპიკერმა, გია ვოლსკიმ განაცხადა.

ვოლსკის თქმით, ერთმანეთს ეჯიბრებიან, ვინ უფრო მეტი დარტყმის მიმყენებელია ქვეყანაში სტაბილურობაზე.

„ოპოზიციაში არის აურზაური არაფრის გამო. მთელი სისტემა ჩამოყალიბებულია იმისთვის, როგორ დაანგრიონ ქვეყანა და რევოლუცია მოაწყონ. ზოგი ამბობს, სალომე ზურაბიშვილი უკეთესს რესურსს ფლობს იმის გამო, რომ მას ბალტიისპირეთის ქვეყნებში იწვევენ, ვიღაც უსმენს და უცხო ენები კარგად იცის. ზოგი ამბობს, რომ არაფრის გამკეთებელია და სჯობს, სააკაშვილი და მისი მიმდევრები იყვნენ პროცესების სათავეში. ერთმანეთს ეჯიბრებიან, ვინ უფრო მეტი დარტყმის მიმყენებელია იმ სტაბილურობაზე, რაც შევინარჩუნეთ. მათი დაპირისპირება და ფუთფუთი გარე ვითარებაზე მოქმედებს, რადგან მსოფლიო აბსოლუტურად სხვა მიმართულებით ვითარდება, დაძაბულობა შენარჩუნებულია და არც ომის საფრთხეა გადავლილი. ეს ჯგუფი ამოვარდნილია რეალური პროცესებიდან, რაც მსოფლიოს ახასიათებს. სალომე ზურაბიშვილი იქნება მეთაური თუ ელენე ხოშტარია, ამ შემთხვევაში, არავითარი მნიშვნელობა არ აქვს“, – განაცხადა გია ვოლსკიმ.