"ოპოზიცია საქართველოში არ არსებობს, სახეზე გვაქვს აგენტურა, რომელიც იკვებება სხვადასხვა ორგანიზაციის მხრიდან და სწორედ ამ აგენტურის დაფინანსების ახალ ტალღასთან გვაქვს საქმე" - გიორგი სოსიაშვილი ბრიტანეთის გრანტებზე

"ეს არის პირდაპირი მცდელობა, რომ წინასაარჩევნოდ დესტრუქცია განახორციელოს ბრიტანეთის წარმომადგენლობამ საქართველოში და მოახდინოს რადიკალთა ერთგვარი გამოცოცხლება," - ამის შესახებ "ქართული ოცნების" წევრმა, გიორგი სოსიაშვილმა განაცხადა, რითაც ბრიტანეთის მთავრობის მიერ გრანტების გამოცხადებას გამოეხმაურა.

"შედეგი, ჩვენ რაც ვიხილეთ არჩევნების შემდეგ - პრაქტიკულად, ოპოზიცია საქართველოში არ არსებობს. სახეზე გვაქვს აგენტურა, რომელიც იკვებება სხვადასხვა ორგანიზაციის მხრიდან და სწორედ ამ აგენტურის დაფინანსების ახალ ტალღასთან გვაქვს საქმე.

ვერავინ და ვერასდროს ვერ შეარყევს ჩვენი ქვეყნის სუვერენიტეტს. ეს არის მორიგი უშედეგო მცდელობა, რომ ხელახლა წინასაარჩევნო დესტრუქცია მოახდინონ და როგორღაც გამოაცოცხლონ ეს რადიკალები, რომლებიც არიან ორიენტირებულები ქვეყნის დაქცევაზე," - აღნიშნა გიორგი სოსიაშვილმა.

ცნობისთვის, გრანტები დიდი ბრიტანეთიდან, თბილისში განხილვის საგანია - ბრიტანეთის მთავრობა საგრანტო პროგრამას აცხადებს. დოკუმენტი დიდი ბრიტანეთის ოფიციალურ ვებ-გვერდზე გამოქვეყნდა. "ქართულ ოცნებაში" აცხადებენ, რომ, დაფინანსების ამერიკული წყაროების შეწყვეტის შემდეგ, ქართული არასამთავრობოებისთვის ბრიტანული გრანტი, რეალურად, USAID-ის ალტერნატივაა და დესტრუქციულ მიზნებს ემსახურება.