ნებისმიერი ცვლილება სამთავრობო აღმასრულებელ რგოლსა და სისტემაში მიმართულია კიდევ უფრო ეფექტური და გამჭვირვალე მართვისთვის - ირაკლი კირცხალია

საპარლამენტო ფრაქცია „ქართული ოცნების“ თავმჯდომარის პირველი მოადგილის, ირაკლი კირცხალიას თქმით, თითოეული ცვლილება, რომელიც აღმასრულებელ ხელისუფლებაში ხდება, მხოლოდ ეფექტურ მართვაზეა ორიენტირებული. როგორც მან აღნიშნა, სამივე პოზიციაზე წარმოდგენილია კანდიდატურები, რომლებიც თავისი საქმის პროფესიონალები არიან.

„ნებისმიერი ცვლილება სამთავრობო აღმასრულებელ რგოლსა და სისტემაში მიმართულია მხოლოდ და მხოლოდ კიდევ უიფრო ეფექტური და გამჭვირვალე მართვისთვის. სამივე პოზიციაზე წარმოდგენილები არიან კანდიდატურები, რომლებიც არიან თავისი საქმის პროფესიონალები. გრიგოლ ლილუაშვილს უდიდესი გამოცდილება აქვს. მარტო წლები, მხოლოდ საპარლამენტო საქმიანობის და საპარლამენტო მოღვაწეობის დროს რეგიონულ კომიტეტში იკავებდა წამყვან თანამდებობას“, - აღნიშნა ირაკლი კირცხალიამ.

საქართველოს მთავრობაში საკადრო ცვლილებები განხორციელდება, რომლის თანახმად, ცალკე სამინისტროდ ჩამოყალიბდება რეგიონული განვითარების სამინისტრო, რომელსაც გრიგოლ ლილუაშვილი უხელმძღვანელებს, სახელმწიფო უსაფრთხოების სამსახურის უფროსის თანამდებობაზე პარლამენტს ანრი ოხანაშვილის კანდიდატურა წარედგინება, იუსტიციის მინისტრის თანამდებობას კი პაატა სალია დაიკავებს.