„მოველოდით ბოდიშის მოხდას იმ სიტყვებისთვის, რაც მან თქვა - რომ საქართველომ დაიწყო ომი“ - გიორგი ბარამიძე სალომე ზურაბიშვილზე

„ნაციონალური მოძრაობის“ წევრის, გიორგი ბარამიძის თქმით, მისი პარტია და მომხრეები, 31 მარტის აქციაზე სიტყვით გამოსვლისას მოელოდნენ ბოდიშს სალომე ზურაბიშვილისგან იმ განცხადებებისთვის, რომელიც მას, თავის დროზე, აგვისტოს ომთან დაკავშირებით აქვს გაკეთებული.

მისივე თქმით, ეს განცხადებები არის უდიდესი შეცდომა სალომე ზურაბიშვილის ბიოგრაფიაში და თუ მას ლიდერობის პრეტენზია აქვს, აქციის მონაწილეების წინაშე ბოდიში უნდა მოეხადა.

„მე პირადად და ჩვენი მომხრეები ველოდით, რომ ამ დღეს მაინც იმ ფონზე, როდესაც რუსული "ჩეკა", „საქართველოს ღალატის კომისია" შექმნა ამ მოღალატურმა და კრიმინალურმა რეჟიმმა, როდესაც უნდათ, რომ რუსეთი გაამართლონ, როგორც თქვა ამ „ჩეკას" უფროსმა წულუკიანმა, ცხინვალი როგორ დაბომბა თურმე, იგივე სიტყვები აქვს, თავის დროზე, ნათქვამი ქალბატონ ზურაბიშვილს. მოველოდით ბოდიშის მოხდას იმ სიტყვებისთვის, რაც მან თქვა, რომ საქართველომ დაიწყო ომი, რომ თურმე მძინარე ცხინვალი დაგვიბომბავს და ა.შ.

იმისთვისაც, რომ მან დაწერა წიგნი, რომელიც რუსებმა გამოიყენეს საქართველოს წინააღმდეგ საერთაშორისო სასამართლოებში. იმიტომ კი არა, რომ ამით ადამიანი შეიცვლება არამედ, ჩემი აზრით, მნიშვნელოვანი იქნებოდა იმიტომ, რომ როდესაც ადამიანს აქვს ლიდერობის სურვილი თუ პრეტენზია, როდესაც ამ პატრიოტული საზოგადოების წინაშე გამოდიხარ ამ კონტექსტში, როდესაც ეს „ჩეკა", "მოღალატეებისა და საქართველოს ღალატის კომისია" მუშაობს, ეს უნდა თქვა, როდესაც, სამწუხაროდ, გაქვს ეს უდიდესი შეცდომა დაშვებული შენს ბიოგრაფიაში. მიუხედავად ამისა, ჩვენ არ ვაპირებთ საქმეების გარჩევას ოპოზიციის შიგნით," - განაცხადა გიორგი ბარამიძემ.