მაკა ბოჭორიშვილი: ევროპული პოლიტიკური გაერთიანების ფორმატში მსჯელობა მიდის ყველა მნიშვნელოვან საკითხზე, რომელიც ევროპის რეგიონს ეხება - მნიშვნელოვანია, რომ საქართველოს პრემიერ-მინისტრი მიიღებს მონაწილეობას დისკუსიებში, რომელიც შეეხება ეკონომიკურ საკითხებს

ევროპული პოლიტიკური გაერთიანების ფორმატში მსჯელობა მიდის ყველა მნიშვნელოვან საკითხზე, რაც ევროპის რეგიონს ეხება - მნიშვნელოვანია, რომ საქართველოს პრემიერ-მინისტრი მიიღებს მონაწილეობას დისკუსიებში, რომელიც შეეხება ეკონომიკურ საკითხებს, - ამის შესახებ საგარეო საქმეთა მინისტრმა მაკა ბოჭორიშვილმა პრემიერ-მინისტრ ირაკლი კობახიძის დანიის სამეფოში ვიზიტთან დაკავშირებით განაცხადა.

მისი თქმით, ევროპული პოლიტიკური გაერთიანების ფორმატი საუკეთესო შესაძლებლობაა შეხვედრებისა და კომუნიკაციისთვის სხვადასხვა ქვეყნების წარმომადგენლებთან და ევროპისთვის მნიშვნელოვან საკითხებზე მსჯელობისთვის.

"ევროპული პოლიტიკური გაერთიანების ფორმატი მნიშვნელოვან ფორმატად ჩამოყალიბდა ევროპელი ლიდერებისთვის. მსჯელობა მიდის ყველა იმ მნიშვნელოვან საკითხზე, რაც შეეხება ევროპის რეგიონს. ჩვენთვის ძალიან მნიშვნელოვანია, რომ ამ დისკუსიების მონაწილე არის საქართველო და საქართველოს პრემიერ-მინისტრი მიიღებს მონაწილეობას დისკუსიებში, რომელიც შეეხება ეკონომიკურ საკითხებს. ზოგადად, საუკეთესო ფორმატია შეხვედრებისთვის, ასევე კომუნიკაციისთვის სხვადასხვა ქვეყნების წარმომადგენლებთან და ევროპისთვის მნიშვნელოვან საკითხებზე მსჯელობისთვის“, - განაცხადა მაკა ბოჭორიშვილმა.

საგარეო საქმეთა მინისტრის თქმით, აღნიშნულ ფორმატში საფრანგეთი ანტინარკოტიკული ინიციატივით გამოვიდა, რასაც მხარი დაუჭირა ქართულმა მხარემ.

"არის სხვადასხვა ინიციატივები ამ ფორმატში, რაც შეეხება ევროპის არა მხოლოდ უსაფრთხოებას, არამედ, ეკონომიკურ განვითარებას. საფრანგეთს ჰქონდა ინიციატივა, ნარკოტიკების წინააღმდეგ ბრძოლაში ევროპის ქვეყნების ძალისხმევის გაერთიანების. ჩვენ ამ ინიციატივას ვუერთდებით. საქართველოსთვის ეს ძალიან მნიშვნელოვანი საკითხია, განსაკუთრებით ბოლო პერიოდში აქტიურად მიმდინარეობს ამ პრობლემაზე მუშაობა, ბრძოლა ნარკოტიკების წინააღმდეგ და ეს ინიციატივა, რომელიც საფრანგეთის მიერ იყო შემოტანილი ამ ფორმატში, ჩვენს მიერ არის მხარდაჭერილი“, - განაცხადა მაკა ბოჭორიშვილმა.