ხაზარაძემ თუ არ იცის, მის გარშემო შეკრებილებმა უნდა იცოდნენ, რომ კომისიის სხდომაზე არგამოცხადება პასუხისმგებლობას ითვალისწინებს, პოლიტიკოსის მანტია ინდულგენცია არ არის - მათიკაშვილი

ხაზარაძემ თუ არ იცის, მის გარშემო შეკრებილებმა უნდა იცოდნენ, რომ კომისიის სხდომაზე არგამოცხადებისთვის „სისხლის სამართლის კოდექსი“ შესაბამის პასუხისმგებლობას ითვალისწინებს, – ამის შესახებ პარლამენტის საპროცედურო საკითხთა კომიტეტის თავმჯდომარე დავით მათიკაშვილმა განაცხადა.

მათიკაშვილის თქმით, პოლიტიკოსის მანტია ინდულგენცია არ არის.

„სამართლებრივი და პოლიტიკური საკითხები ერთმანეთისგან გამიჯნულია. ბუნებრივია, რადიკალებს ამ ყველაფრის აღრევა უნდათ, მაგრამ საზოგადოებამ კარგად დაინახა, რომ მამუკა ხაზარაძე დროებითი საგამოძიებო კომისიის სხდომაზე არ გამოცხადდა. მისულიყო და პასუხები გაეცა, რაც მარტივი სამართლებრივი მოცემულობა იყო. კედლებს ეხეთქებიან, რადგან სურთ, რომ პოლიტიკური ანტურაჟი შექმნან. თუ ხაზარაძემ არ იცის, მის გარშემო შეკრებილებმა ელემენტარული იურისპოდენცია კი უნდა იცოდნენ, რომ სხდომაზე არგამოცხადებისთვის „სისხლის სამართლის კოდექსი“შესაბამის პასუხისმგებლობას ითვალისწინებს. საკუთარ ქმედებებზე ყველამ ჩვენი პასუხისმგებლობა უნდა ავიღოთ, მათ შორის ხაზარაძემ. პოლიტიკოსის მანტია ინდულგენცია არ არის, რომ სამართლებრივი პროცესებისგან იყოს დაცლილი“, – განაცხადა დავით მათიკაშვილმა.