გიორგი ვოლსკი შალვა პაპუაშვილის წერილზე: მე დარწმუნებული ვარ, რომ უახლოეს მომავალში ვითარება შეიცვლება და ევროკავშირი იმ სტანდარტს დაუბრუნდება, რასაც ევროპული სტანდარტი ჰქვია, რატომაც ჩვენ ავირჩიეთ ევროინტეგრაციის პროცესი

ეს პირველი წერილი არ არის, რომელსაც პარლამენტის თავმჯდომარე უგზავნის, თან ღია ფორმით, - განაცხადა გადაცემაში „დღის ქრონიკა“ საქართველოს პარლამენტის თავმჯდომარის პირველმა მოადგილემ, გიორგი ვოლსკიმ, რომელიც პარლამენტის თავმჯდომარის, შალვა პაპუაშვილის წერილს გამოეხმაურა.

„მე დარწმუნებული ვარ, რომ უახლოეს მომავალში ვითარება შეიცვლება და ევროკავშირი იმ სტანდარტს დაუბრუნდება, რასაც ევროპული სტანდარტი ჰქვია, რატომაც ჩვენ ავირჩიეთ ევროინტეგრაციის პროცესი. ეს ახლა წმინდა წყლის ყაჩაღობაა, პოლიტიკური ხულიგნობაა რასაც ვუყურებთ, რომ არ ჰქონდეს ასეთი მძიმე შედეგებზე გათვლა, ამაზე ცოტა შეიძლება ღიმილიანი შეფასებებიც გაგვეკეთებინა, მაგრამ გათვლა არის ძალიან ბოროტი. უნდა გვახსოვდეს, რომ ყველა პროცესის საფუძველი არის ეს მიზეზი.

ევროკავშირი პირდაპირ აფინანსებს იმ ორგანიზაციებს, რომლებიც ლამის შურდულებით დასდევენ პოლიტიკურ ფიგურებს, მათთვის არ მოსაწონ პოლიტიკოსებს. გავიხსენოთ მარიამ ლაშხზე, მის მცირეწლოვან შვილებთან ერთად თუ ჩემზე თავდასხმა. ეს თავდასხმა და ფსიქოლოგიური ტერორი, რომელიც მოაწყვეს, შეიძლება ძალიან ძვირად დაუჯდეს როგორც ბავშვს, ასევე დიდ ადამიანსაც.

ამ ვითარებაში თავისი პოლიტიკური და ფინანსური ასპექტებით, როდესაც პირდაპირ არის ჩარეული საერთაშორისო, მაღალი დონის წარმომადგენლობა, ევრო ბიუროკრატია, რომელიც ძალიან ბევრი ქვეყნისთვის მიუღებელია, რასაკვირველია ეს არის წერილის მთავარი შინაარსი და მე ვფიქრობ დღეს თუ არა ხვალ ამ ყველაფერს გარკვეული განვითარება ექნება მათ შორის შეფასებებშიც.

არ შეიძლება მუდმივად ასეთი დაძაბულობის რეჟიმში ცხოვრობდეს მსოფლიო. მოხდება ისეთი რამ, რაც საერთოდ დაგვავიწყებს ნებისმიერი საელჩოს განცხადებას და ჰერჩინსკის გვარიც არ გვეხსომება იმ მიმართულებით თუ განვითარდა, რასაც ომის პარტია ლამობს“, - აღნიშნა გიორგი ვოლსკიმ.

პარლამენტის თავმჯდომარე შალვა პაპუაშვილი საქართველოში ევროკავშირის ელჩისადმი გაგზავნილ წერილს სოციალურ ქსელში ასაჯაროებს.