გაერო-ს საჯარო სამსახურისა და საჯარო სერვისების ყოველწლიური ფორუმის საქართველოში ჩატარება საჯარო სერვისების განვითარების გზაზე ქვეყნის მიერ მიღწეული პროგრესის კიდევ ერთი აღიარებაა“ - იუსტიციის მინისტრი

ჩვენი მიზანია ძლიერი და ადამიანზე ორიენტირებული სახელმწიფო - სახელმწიფო, რომელიც უსმენს მოქალაქეს, ზრუნავს მასზე და ქმნის შესაძლებლობებს, - განაცხადა იუსტიციის მინისტრმა ხელვაჩაურის იუსტიციის სახლის გახსნაზე.

პაატა სალიამ საჯარო სერვისების მიწოდების კუთხით ქვეყნის მიერ მიღწეულ პროგრესზე ისაუბრა. მისი თქმით, იუსტიციის სახლი კავკასიის რეგიონში პირველი უწყებაა, რომელმაც წარმატებით დანერგა ორგანიზაციული თვითშეფასების ევროპული მოდელი „შეფასების ერთიანი სისტემა“ (CAF) და მოიპოვა ეფექტიანი მომხმარებლის სტატუსი.

მინისტრმა აღნიშნა, რომ მიმდინარე წელს საქართველო უმასპინძლებს გაერო-ს საჯარო სერვისების საერთაშორისო ფორუმს.

„ამ ღონისძიებაზე მსოფლიოს სხვადასხვა ქვეყნიდან, დაახლოებით, 500 დელეგატი შეიკრიბება, რათა ერთმანეთს გაუზიარონ გამოცდილება სახელმწიფო ინსტიტუტების ტრანსფორმაციის, ინოვაციებისა და ტექნოლოგიური განვითარების მიმართულებით. ის ფაქტი, რომ გაერო-მ ამ მასშტაბური საერთაშორისო ღონისძიების ჩატარების ადგილად საქართველო აირჩია, ნათლად მიუთითებს იმ ნდობასა და პროგრესზე, რომელსაც ჩვენმა ქვეყანამ საჯარო სერვისების განვითარების გზაზე მიაღწია“, - განაცხადა პაატა სალიამ