„დროას“, „გირჩი - მეტი თავისუფლებისა“ და „სტრატეგია აღმაშენებლის“ წარმომადგენლები შეხვედრების გასამართად სტრასბურგსა და ბრიუსელში გაემგზავრნენ

„დროას“, „გირჩი – მეტი თავისუფლებისა“ და „სტრატეგია აღმაშენებლის“ წარმომადგენლები ერთობლივი ვიზიტით სტრასბურგსა და ბრიუსელში გაემგზავრნენ.

როგორც პარტიების წარმომადგენლები აცხადებენ, შეხვედრებს გამართავენ ევროკავშირის სტრუქტურებში. მათი თქმით, ვიზიტის მიზანია იმ პრობლემების განხილვა, რომლებიც კანდიდატის სტატუსის მიღებასთან დაკავშირებით არსებობს.

„შეხვედრების ერთი ნაწილი დაგეგმილი გვაქვს სტრასბურგში, სადაც არის ევროპარლამენტის სესია. შეხვედრები გვექნება ევროპარლამენტარებთან, მათ შორის კუბილიუსთან. შეხვედრების მეორე ნაწილი იქნება ბრიუსელში, სადაც უკვე შეხვედრები გვექნება ევროკომისიაში უშუალოდ იმ ხალხთან, ვინც მუშაობს საქართველოს საკითხებზე. ძირითადი თემა იქნება სტატუსის საკითხი, რომელიც უნდა გადაწყდეს წლის ბოლოს და გვექნება განხილვა იმ პრობლემების, რომლებიც არსებობს ამ სტატუსის მიღებასთან დაკავშირებით“, – განაცხადა ზურაბ გირჩი ჯაფარიძემ.

„სტრატეგია აღმაშენებლის“ ლიდერის, გიორგი ვაშაძის განმარტებით, ოპოზიცია მზად არის, აიღოს პასუხისმგებლობა და იმუშაოს კანდიდატის სტატუსის მოპოვების მიმართულებით.