„ჩვენ ვიმედოვნებთ, რომ პრეზიდენტ ტრამპს აქვს ყველა საჭირო ინსტრუმენტი რუსეთზე სანქციების ზეწოლის გასაძლიერებლად“ - ზელენსკი

შეერთებულ შტატებთან მინერალური რესურსების შესახებ შეთანხმება ნატო-ს საკითხს არ მოიცავს და არც არასდროს მოიცავდა, - ტრამპის რამდენიმე დღის წინ გაკეთებულ განცხადებას, ზელენსკი ეხმიანება.

გერმანიის საგარეო საქმეთა მინისტრთან ერთობლივ ბრიფინგზე, უკრაინის პრეზიდენტმა თქვა, რომ ამერიკა-უკრაინის შეთანხმების ახალ პროექტზე ორივე მხარის იურისტები მუშაობენ.

"რუსები არღვევენ იმას, რასაც ისინი ამერიკას დაჰპირდნენ – ყოველ შემთხვევაში, რაც ამერიკამ ჩვენ გვითხრა და საჯაროდ განაცხადა. ჩვენ ვიმედოვნებთ, რომ პრეზიდენტ ტრამპს აქვს ყველა საჭირო ინსტრუმენტი რუსეთზე სანქციების ზეწოლის გასაძლიერებლად. უკრაინა სხვადასხვა დონეზე აშშ-ს აწვდის ინფორმაციას რუსეთის მიერ შეთანხმების დარღვევის თაობაზე.

გვსურს, რომ გადაიდგას ძლიერი ნაბიჯები. ასევე გაიმართება იმ ქვეყნებთან პირველი შეხვედრა, რომლებიც, მზად არიან უკრაინის ტერიტორიაზე პოტენციური
სამშვიდობო კონტინგენტის განსათავსებლად.

ჩვენ მოვისმენთ გარკვეულ განმარტებებს და დეტალებს. მნიშვნელოვანია, რომ ამ შეხვედრის საფუძველი იქნება უკრაინული მხარის მიერ მომზადებულ წინადადებები. უნდა ითქვას ისიც, რომ უკრაინასა და აშშ-ს შორის მინერალების შესახებ ახალი შეთანხმების პროექტში არ არის არანაირი მითითება ნატო-ს შესახებ. თუმცა, ეს შეთანხმება არ უნდა ეწინააღმდეგებოდეს უკრაინის ევროკავშირში მომავალ გაწევრიანებას." - აცხადებს ვოლოდიმირ ზელენსკი.

შეგახსენებთ, მანამდე, ტრამპმა ზელენსკი მინერალების შესახებ შეთანხმებიდან "უკან დახევაში" დაადანაშაულა. იყო გარკვეულწილად მუქარაც, რომ თუ უკრაინის პრეზიდენტი შეთანხმებას ხელს არ მოაწერს, მას "დიდი პრობლემები შეექმნება". სწორედ აქვე განაცხადა ტრამპმა, რომ უკრაინას სურს იყოს ნატო-ს წევრი, თუმცა ის ამას ვერასდროს შეძლებს.