ამ ქვეყანაში პატიმრებს კლავდნენ, აუპატიურებდნენ, სცემდნენ - ამ ყველაფრის ავტორი სააკაშვილი ახლა პირობებს აყენებს, რაც ამორალურია - მამუკა მდინარაძე 

"მოთხოვნების დაყენება ამორალურია განსაკუთრებით იმ ადამიანისგან, რომელიც სისტემას ედგა სათავეში, რომელი სისტემის პირობებშიც არა თუ მსგავსი უფლებები, არამედ სიცოცხლის უფლება ჰქონდათ ადამიანებს და პატიმრებს წართმეული", - ამის შესახებ „ქართული ოცნების“ ერთ-ერთმა ლიდერმა მამუკა მდინარაძემ ჟურნალისტებთან განაცხადა .

„სისტემის პირობებში არა თუ მოთხოვნას აყენებდა პატიმარი, არამედ უბრალოდ ზედმეტი სიტყვის ფასი შეიძლება, მისი სიცოცხლე ყოფილიყო. ახლა ამ სისტემის ავტორი კლინიკაში მისთვის ჯანდაცვის მომსახურების გაწევის მიზნით გადაყვანას რომ სთავაზობენ, იქიდან პირობებს აყენებს და ჩვენ ამაზე მსჯელობის დროს ყველას გვავიწყდება, რომ მისი ავტორობით ამ ქვეყანაში პატიმრებს, თუ რაღაც არ მოეწონებოდათ, კლავდნენ, აუპატიურებდნენ, სცემდნენ, გონების დაკარგვამდე სცემდნენ და ამის ავტორი ახლა პირობებს აყენებს თუ გინდათ, რომ მიმკურნალოთ, მოდი ეს პირობები შემისრულეთო, ამორალურია. უბრალოდ, ექიმებს დაუჯეროს და ულტიმატუმებს თავი უნდა დაანებოს“, - განაცხადა მამუკა მდინარაძემ.