აჭარის მთავრობის სხდომაზე დღის წესრიგით გათვალისწინებული საკითხები და რეგიონისთვის მნიშვნელოვანი მიმდინარე თემები განიხილეს

აჭარის მთავრობის მორიგი სხდომა გაიმართა, რომელზეც დღის წესრიგით გათვალისწინებული საკითხები და რეგიონისთვის მნიშვნელოვანი მიმდინარე თემები განიხილეს.

მთავრობის თავმჯდომარემ, ზურაბ პატარაძემ ყურადღება ზაფხულის ტურისტული სეზონის შედეგებზე გაამახვილა. ბოლო 7 თვის მონაცემებით, აჭარას 2 მილიონზე მეტი ვიზიტორი ეწვია. ივლისში ბათუმის საერთაშორისო აეროპორტში ფრენების რაოდენობა 31%-ით გაიზარდა, ჯამში კი რეგიონში 3 000-მდე საერთაშორისო რეისი განხორციელდა.

ხელისუფლების უმთავრეს პრიორიტეტად ზღვისპირა მუნიციპალიტეტებთან ერთად, მთის განვითარება რჩება, კურორტ გოდერძიზე აქტიურად მიმდინარეობს ინფრასტრუქტურული სამუშაოები, განსაკუთრებული აქცენტი კეთდება საქმიანი ტურიზმის განვითარებაზე - იგეგმება მსხვილი საინვესტიციო და საზღვაო ფორუმის გამართვაც.

პარალელურად, აქტიურად ვითარდება საგანმანათლებლო და სოციალური ინფრასტრუქტურა. ახალ სასწავლო წელს ბათუმი 4 ახალი და 2 რეაბილიტირებული სკოლით ხვდება, რეგიონში კი სულ 25 სკოლა განახლდა. გრძელდება საბავშვო ბაღების მშენებლობა-რეაბილიტაციაც.

ახალი ბაღის მშენებლობა დაიწყო ე.წ. ოცნების ქალაქშიც, ამავე ტერიტორიაზე სკოლის მშენებლობისთვის საპროექტო სახარჯთაღრიცხვო დოკუმენტის მომზადებაზე კონკურსი გამოცხადდა.