„უკრაინის 80 ქალაქი დაიტბორება, გადაადგილება შეფერხდება...“ - რა საფრთხეზე საუბრობენ ამერიკელი ანალიტიკოსები

რუსმა ოკუპანტებმა შესაძლოა, სცადონ კახოვკას ჰიდროელექტროსადგურის კაშხლის აფეთქება, რათა დაფარონ მათი უკან დახევა და თავიდან აიცილონ უკრაინული ჯარების ხერსონის ოლქში გადაადგილება. ამის შესახებ ნათქვამია ომის შესწავლის ამერიკული ინსტიტუტის ( ISW ) ანგარიშში.

ანალიტიკოსები აღნიშნავენ, რომ რუსული ძალები უკრაინას ჰიდროელექტროსადგურის დანგრევაში დაადანაშაულებენ.

ხერსონის ოლქის დასავლეთ ნაწილიდან რუსული ჯარების გაყვანა დაიწყო. რუსული ძალები, სავარაუდოდ, აპირებენ გააგრძელონ გაყვანა მომდევნო რამდენიმე კვირის განმავლობაში, მაგრამ შესაძლოა მათ გაქცევა მოუწიოთ თუ უკრაინული ძალები გადაწყვეტენ თავდასხმას.

„უკრაინას არავითარი მატერიალური ინტერესი არ აქვს კაშხლის აფეთქების. კაშხლის აფეთქებით უკრაინის 80 ქალაქი დაიტბორება, გადაადგილება შეფერხდება. თუმცა, რუსეთს  კაშხლის აფეთქების ყველა მიზეზი აქვს, რათა დაფაროს უკან დახევა და დაიკავოს დნიპროს ტერიტორია, მდინარე, რომლის გადალახვაც უკრაინის ჯარს დასჭირდება კონტრშეტევის გასაგრძელებლად“, - ნათქვამია ანგარიშში.

ანალიტიკოსები, ასევე, ხაზს უსვამენ, რომ ნებისმიერი პრეტენზია იმის შესახებ, რომ რუსული ძალები არ ააფეთქებენ კაშხალს ყირიმში წყალმომარაგების შეწყვეტის გამო, აბსურდულია. ISW-ის ექსპერტები ამბობენ, რომ 2014 წლის ოკუპაციის შემდეგ ყირიმი რამდენიმე წლის განმავლობაში წყლის გარეშე დარჩა.