ვოლოდიმირ ზელენსკიმ „სახიფათო“ უწოდა დონალდ ტრამპის იდეას ევროპაში ახალი უსაფრთხოების სისტემის შესახებ

უკრაინის პრეზიდენტმა, ვოლოდიმირ ზელენსკიმ აშშ-ის პრეზიდენტის, დონალდ ტრამპის იდეას ევროპაში ახალი უსაფრთხოების სისტემის შესახებ „სახიფათო“ უწოდა.

უკრაინის პრეზიდენტის თქმით, მას ჯერ არ აქვს დონალდ ტრამპის მიერ ევროპისთვის შემოთავაზებული ახალი უსაფრთხოების სისტემის ყველა დეტალი. ამავდროულად, როგორც ზელენსკიმ აღნიშნა, რუსეთსა და ევროპას შორის პოტენციური შეთანხმება შეიძლება სახიფათო იყოს.

„მე ვერ ვხედავ რუსეთის მხრიდან რაიმე ნიშანს ან სიგნალს, რომ მზადაა ყველაფრისთვის. ვფიქრობ, სწორედ ამიტომ არის ეს საშიში. როდესაც მათ, ვგულისხმობ რუსეთს, არ სურთ ისაუბრონ იმაზე, როგორ დაასრულონ ეს ომი, ევროპაში ახალი უსაფრთხოების არქიტექტურის შექმნა, საშიშია. ჩვენ ასევე არ ვართ ნატო-ს წევრები. ამიტომ, მე არ ვსაუბრობ ნატო-ს და ევროკავშირის სახელით, მაგრამ ეს ყველა ჩვენგანისთვის საშიშია. ჩვენ ყველანი ევროპაში ვცხოვრობთ. ჩვენ არ გვინდა „იალტა 2“. ჩვენ არ ვართ მზად ასეთი ფორმატისთვის. ჩვენ არ გვინდა, რომ რუსეთმა გაგვყოს“, – აღნიშნა ვოლოდიმირ ზელენსკიმ.

მისივე თქმით, სუვერენიტეტი და ტერიტორიული მთლიანობა ნებისმიერი დამოუკიდებელი სახელმწიფოსთვის მთავარი საკითხებია.

„თუ გსურთ, იყოთ თავისუფალი, დემოკრატიული ქვეყანა, თქვენ, სულ მცირე, გჭირდებათ თქვენი სუვერენიტეტისა და ტერიტორიული მთლიანობის პატივისცემა“, – აღნიშნა უკრაინის პრეზიდენტმა.

ცნობისთვის, აშშ-ის პრეზიდენტ დონალდ ტრამპის სპეციალურმა წარმომადგენელმა, ჯარედ კუშნერმა განაცხადა: „დონალდ ტრამპმა ევროპელ ლიდერებთან ისაუბრა ფართო ევროპული უსაფრთხოების არქიტექტურის აუცილებლობაზე, რომელსაც ხანგრძლივი მშვიდობისთვის პირობების შექმნა შეუძლია“.