უკრაინის დონეცკის, ლუგანსკის, ხერსონისა და ზაპოროჟიეს ოლქებში ე.წ. „რეფერენდუმები“ დღეს იწყება

ოკუპირებულ დონეცკისა და ლუგანსკის, ასევე ხერსონისა და ზაპოროჟიეს ოლქებში რუსეთთან შეერთების შესახებ ე.წ. „რეფერენდუმები“ დღეს იწყება. ამის შესახებ უცხოური მედია წერს. 

გამოცემის ცნობით, ე.წ. დონეცკისა და ლუგანსკის სახალხო რესპუბლიკებში მოსახლეობას „რეფერენდუმის“ მხოლოდ ერთ კითხვაზე მოუწევთ პასუხის გაცემა: „მხარს უჭერთ თუ არა რესპუბლიკის შესვლას რუსეთში ფედერაციის სუბიექტის სახით?“ ხერსონისა და ზაპოროჟიეს ოლქებში კი სამი კითხვა იქნება დასმული : „გსურთ თუ არა უკრაინისგან გამოყოფა, დამოუკიდებელი სახელმწიფოების შექმნა და რუსეთთან შეერთება?“

რუსული მედიის ცნობით, ე.წ. „საარჩევნო უბნები“ რუსეთშიც გაიხსნება, ვინაიდან დონბასის, ზაპოროჟიესა და ხერსონის მცხოვრებთა მნიშვნელოვანი ნაწილი იძულებული გახდა საკუთარი სახლები დაეტოვებინათ და რუსეთში გადასულიყვნენ.

ე.წ. „რეფერენდუმები“ 27 სექტემბერამდე გაგრძელდება.