ტრამპმა ხელი მოაწერა ბრძანებას, რომლის თანახმადაც ფედერალური შენობები ანტიკურ სტილში უნდა აშენდეს

აშშ-ის პრეზიდენტმა დონალდ ტრამპმა ხელი მოაწერა აღმასრულებელ ბრძანებას, რომლის თანახმადაც ქვეყანაში ფედერალური შენობები ანტიკურ სტილში უნდა აშენდეს. ინფორმაციას თეთრი სახლი ავრცელებს.

„ფუნქციონირებადი ფედერალური საზოგადოებრივი შენობები საჯარო სივრცეებს უნდა ალამაზებდეს, შთააგონებდეს ადამიანის სულისკვეთებას, დადებითად აისახოს შეერთებულ შტატებზე და ფართო საზოგადოების მხრიდან პატივისცემას იმსახურებდეს. აგრეთვე მათი, როგორც სამოქალაქო შენობების იდენტიფიცირება ვიზუალურად უნდა ხდებოდეს“, - აღნიშნულია ბრძანების ტექსტში.

აღმასრულებელ ბრძანებაში, რომელსაც „გავხადოთ ფედერალური არქიტექტურა კვლავ მშვენიერი“ ჰქვია, ცალკე თავი ეთმობა ანტიკური არქიტექტურის განმარტებას.

„კლასიკური არქიტექტურა“ ნიშნავს არქიტექტურულ ტრადიციას, რომელიც ბერძნული და რომაული არქიტექტურის პრინციპებისგან მომდინარეობს და რომელიც მოგვიანებით განავითარეს რენესანსის ეპოქის ისეთმა წარმომადგენლებმა, როგორებიც არიან ალბერტი, ბრუნელესკი, მიქელანჯელო და პალადიო“, - ნათქვამია ბრძანებაში