ელენე ხოშტარია: „რვიანი“ ვერ დაიშლება, რადგან მაშინ არჩევნებში უნდა შევიდეს რომელიმე, იმედია, ერთმანეთის ჯინაზე ამას არ იზამენ

ჩერგო ძალიან ცუდად მოიქცა, „რვიანი“ არც ჩერგოს და არც არავის ხასიათზე აწყობილა, იმედია, „რვიანი“ ვერ დაიშლება, – ამის შესახებ „დროას“ ლიდერი ელენე ხოშტარია სოციალურ ქსელში წერს.

როგორც ხოშტარია წერს, ბევრნი უნდა იყვნენ ქუჩაში, ხოლო, „ყველაფერი, რაც ამას უშლის ხელს, არის მავნებლობა ან უპასუხისმგებლობა“.

„დააფიქსირებს თუ არა ელენე ხოშტარია პოზიციას ბავშვის მიმართ საშინელ საქციელზე?“; „დაგმობს თუ არა ჩერგოს ელენე ხოშტარია?“; „რვიანი“ იშლება? ვერ შეუკრიათ ერთობა“; „13-ში გასვლას აზრი აქვს?“;  „რას იტყვის „რვიანის“ წევრი ელენე ხოშტარია“; „დაველოდოთ აბა, რა ტაქტიკურ სვლას აირჩევს“ – სირცხვილია, მეგობრებო. ჩერგო ძალიან ცუდად მოიქცა, „რვიანი“ ჩერგოს ხასიათზე არ აწყობილა და არც არავის ხასიათზე. ამორალური ბევრი გიჭამიათ სათითაოდ, ძალიან ბევრი. ქვეყანას დიდი პრობლემები აქვს და პოლიტიკოსებს ჩვენს პირად და პარტიულ ეგოებზე უფრო დიდი ამოცანა: ბევრნი უნდა ვიყოთ ქუჩაში. ყველაფერი, რაც ამას უშლის ხელს, არის მავნებლობა ან უპასუხისმგებლობა.

Ps. იმედია, „რვიანი“ ვერ დაიშლება, რადგან მაშინ არჩევნებში უნდა შევიდეს რომელიმე. იმედია, ერთმანეთის ჯინაზე მაგას არ იზამენ. სხვა არაფერია „რვიანი“, – წერს ელენე ხოშტარია.

ცნობისთვის, „ნაციონალური მოძრაობის“ თავმჯდომარე თინა ბოკუჩავამ რვა ოპოზიციურ პარტიას მიმართა, სოციალურ ქსელში გამოყენებული ბავშვების ფოტოების გამო, მიიღონ გადაწყვეტილება „ფედერალისტების“ ლიდერთან, თამარ ჩერგოლეიშვილთან ურთიერთობის გაწყვეტის შესახებ. საუბარია „ფეისბუქში“ გამოქვეყნებულ კომენტარებზე, სადაც ჩერგოლეიშვილი ბავშვების ფოტოებს იყენებს. აღნიშნულთან დაკავშირებით თავად ჩერგოლეიშვილმა ბოდიში მოიხადა. ამასთან, თამარ ჩერგოლეიშვილი გამოეხმაურა თინა ბოკუჩავას განცხადებას და აღნიშნა: „გაუგებარია, რას ემსახურება ბოკუჩავას მუქარა, „ნაცმოძრაობა“ დე ფაქტო ისედაც გასული იყო „რვიანიდან“, ყველა წარმატებული ღონისძიების შემდეგ შარზე იყო და წიხლებს იქნევდა“.