ტრამპი ნიუ-იორკში ვერტმფრენის კატასტროფის გამო მწუხარებას გამოთქვამს

აშშ-ის პრეზიდენტი, დონალდ ტრამპი ნიუ-იორკში, მდინარე ჰუდზონში ვერტმფრენის ჩავარდნის გამო მწუხარებას გამოთქვამს.

„მდინარე ჰუდზონში ვერტმფრენმა საშინელი კატასტროფა განიცადა. როგორც ჩანს, ექვსი ადამიანი - პილოტი, ორი ზრდასრული და სამი ბავშვი ჩვენთან აღარ არიან. კატასტროფის ამსახველი მასალები შემზარავია. ღმერთმა დალოცოს გარდაცვლილების ოჯახები და მეგობრები. ტრანსპორტის მდივანი, შონ დაფი და მისი ნიჭიერი გუნდი უკვე მუშაობენ. განცხადება იმის შესახებ, თუ რა მოხდა, მალე გაკეთდება!“, - დაწერა ტრამპმა.

ცნობისთვის, ვერტმფრენი ჯერსი-სითის მიმდებარედ, მდინარე ჰუდზონში გვიან ღამით ჩავარდა. წინასწარი ინფორმაციით, ვერტმფრენში კომპანია Siemens-ის ფილიალის ხელმძღვანელი ესპანეთსა და სამხრეთ-დასავლეთ ევროპაში, აუგუსტინ ესკობარი და მისი ოჯახის წევრები იმყოფებოდნენ. ბორტზე მყოფი ყველა ადამიანი დაიღუპა.