The Wall Street Journal: აშშ სამაშველო ოპერაციას ატარებს ირანის თავზე გამანადგურებლის ჩამოვარდნის შემდეგ

ირანის ტერიტორიაზე ამერიკული სამხედრო თვითმფრინავის ჩამოვარდნის შემდეგ, ეკიპაჟის წევრების გადასარჩენად სამძებრო ოპერაცია დაიწყო. ინფორმაციას ამის შესახებ გამოცემა The Wall Street Journal-ი წყაროებზე დაყრდნობით ავრცელებს.

ინფორმირებული წყაროების ცნობით, ეს არის ომის დაწყებიდან პირველი დადასტურებული შემთხვევა, როდესაც აშშ-ის გამანადგურებელი ქვეყნის შიგნით ჩამოვარდა.

ირანის სახელმწიფო მაუწყებელმა IRIB-მა პარასკევს დილით გაავრცელა ინფორმაცია, რომ ისლამური რევოლუციის გუშაგთა კორპუსის საჰაერო თავდაცვის ძალებმა ცენტრალურ ირანში ამერიკული საბრძოლო თვითმფრინავი ამოიღეს მიზანში.

ირანის უშიშროების სამსახურებთან დაახლოებულმა სააგენტო Fars News-მა კი გამოაქვეყნა ფოტომასალა, რომელზეც, მათი მტკიცებით, ჩამოგდებული თვითმფრინავის ნამსხვრევებია ასახული.