THE TELEGRAPH: დონალდ ტრამპის რეზიდენციაში, მარ-ა-ლაგოში საზენიტო-სარაკეტო სისტემები განათავსეს - აშშ-ის საიდუმლო სამსახური უსაფრთხოების გაძლიერებულ ზომებზე საუბრობს

აშშ-ის პრეზიდენტის დონალდ ტრამპის ფლორიდის რეზიდენციის, მარ-ა-ლაგოს მახლობლად, საზენიტო-სარაკეტო თავდაცვის ორი სისტემა განათავსეს. ინფორმაციას The Telegraph-ი ავრცელებს.

აშშ-ის საიდუმლო სამსახურის განცხადებით, პრეზიდენტის უსაფრთხოებისთვის პასუხისმგებელი უწყება „მომეტებული საფრთხის პირობებში“ მუშაობს და დაცვის ზომებს მუდმივად აძლიერებს.

„აშშ-ის საიდუმლო სამსახური მომეტებული საფრთხის პირობებში მუშაობს. ჩვენ მუდმივად ვაუმჯობესებთ დაცვის ოპერაციებს და ვიყენებთ უახლეს საშუალებებს, ტექნოლოგიებსა და მეთოდებს იმ პირთა უსაფრთხოების უზრუნველსაყოფად, რომელთა დაცვაც გვევალება“, - განუცხადა უწყების წარმომადგენელმა The Telegraph-ს.

გამოცემის ინფორმაციით, Avenger-ის ტიპის ორი საჰაერო თავდაცვის სისტემა ტრამპის რეზიდენციასთან ახლოს, მცურავ ბარჟაზე განათავსეს.

Avenger-ის ტიპის სისტემები Humvee-ს მარკის სამხედრო ავტომობილებზეა დამონტაჟებული და მცირე მანძილზე მოქმედი რაკეტებით არის აღჭურვილი. მათი დანიშნულება მოახლოებული საჰაერო დარტყმებისა და დაბალ სიმაღლეზე მფრინავი საჰაერო ხომალდების განადგურებაა. მსგავსი სისტემები აგვისტოშიც შენიშნეს, როდესაც ტრამპი ნიუ-ჯერსის შტატის ქალაქ ბედმინსტერში, საკუთარ გოლფის მოედანზე იმყოფებოდა.

საიდუმლო სამსახურის მოთხოვნით, ტრამპის მარ-ა-ლაგოში ყოფნის პერიოდში რეზიდენციის თავზე ფრენები იზღუდება. ფედერალური სასამართლოს დოკუმენტების თანახმად, უწყება ამ შეზღუდვის მუდმივ რეჟიმში ამოქმედებას ითხოვს, რასაც უსაფრთხოების შესახებ მიღებული არასახარბიელო სადაზვერვო ინფორმაცია, მათ შორის ტერორისტული საფრთხეები, განაპირობებს.

საიდუმლო სამსახური, რომელიც მაღალი თანამდებობის პირებს, მათ შორის პრეზიდენტსა და ვიცე-პრეზიდენტს იცავს, მიმდინარე წლის დასაწყისში აცხადებდა, რომ მის დასაცავ პირებზე მუქარების რაოდენობა წინა წელთან შედარებით 40%-ით გაიზარდა.

„დღევანდელი საფრთხის გარემო მომეტებული, რეალური და ცვალებადია“, - წერს საიდუმლო სამსახურის დირექტორის მოადგილე მეთიუ ქუინი სასამართლოსთვის წარდგენილ დოკუმენტში, რომლითაც უწყება მარ-ა-ლაგოს გარშემო საჰაერო სივრცის მუდმივად შეზღუდვას ითხოვს.

მისივე განმარტებით, რეზიდენციის მიმდებარე საჰაერო სივრციდან მომდინარე საფრთხე მუდმივი და მნიშვნელოვანი ხასიათისაა. რადგან მარ-ა-ლაგო პრეზიდენტის ერთ-ერთი მთავარი საცხოვრებელი ადგილია, საიდანაც ის ხშირად ახორციელებს ქვეყნის მართვას, ამ საფრთხის მაქსიმალურად შემცირება აუცილებელია იმის მიუხედავად, იმყოფება თუ არა ტრამპი ადგილზე.

The Telegraph-ის ცნობით, საფრთხის ზრდის ერთ-ერთი მთავარი მიზეზი, სავარაუდოდ, აშშ-ის კონფლიქტია ირანთან. ამასთან, ბოლო წლებში ტრამპი აშშ-ის მოქალაქეების მხრიდან მკვლელობის რამდენიმე მცდელობის სამიზნეც გახდა.

ამერიკელმა ოფიციალურმა პირებმა მანამდე განაცხადეს, რომ ტრამპის მეორე საპრეზიდენტო ვადის დაწყებიდან დასავლეთ პალმ-ბიჩის რაიონში საჰაერო სივრცის დროებითი შეზღუდვების დარღვევის გამო ათობით საჰაერო ხომალდის გადაჭერა გახდა საჭირო. მათი უმეტესობა მცირე ზომის, ერთძრავიანი თვითმფრინავი იყო, რომელთა პილოტებმა ფრენის შეზღუდვების შესახებ არ იცოდნენ.