საფრანგეთის შს მინისტრი: პრეფექტებს დავავალე, უზრუნველყონ, რომ პოლიციამ დისტანცია შეინარჩუნოს, ვიდრე საპროტესტო აქციები მშვიდობიანად გაგრძელდება, მაგრამ ვანდალიზმის შემთხვევაში მკაცრად ჩაერევიან

პარიზის მერი საფრანგეთის მთავრობას და პოლიციას მოუწოდებს, რომ პრიორიტეტი დიალოგს მიანიჭონ.

ემანუელ გრეგუარი ასევე აღნიშნავს, რომ ქალაქის მერია ღია იქნება, რათა ახალგაზრდებმა დემოკრატიულად გაუწიონ ორგანიზება თავიანთ მოძრაობას.

„მთავრობამ კონკრეტული რეაგირება უნდა მოახდინოს მასწავლებლების ნაკლებობაზე, მათ არყოფნაზე და საგანმანათლებლო, სამედიცინო-სოციალური და ხელმძღვანელობითი პერსონალის საჭიროებაზე“, – განაცხადა პარიზის მერმა.

ამასთან, საფრანგეთის შინაგან საქმეთა მინისტრმა, ლორან ნუნიესმა რადიო „ფრანს ინტერთან“ ინტერვიუში განაცხადა, რომ „სრული ნდობა აქვს შინაგანი უსაფრთხოების ძალების მიმართ, რათა მათ დემონსტრანტები მართონ“. მისი თქმით, ენდობა პოლიციელებს მაშინაც კი, როდესაც დემონსტრაციების შესაკავებლად გადაჭარბებული ძალის გამოყენებაში ადანაშაულებენ.

„პრეფექტებს დავავალე, უზრუნველყონ, რომ სამართალდამცავებმა დისტანცია შეინარჩუნონ, ვიდრე საპროტესტო აქციები მშვიდობიანად გაგრძელდება, მაგრამ, რა თქმა უნდა, ისინი ყოველთვის მკაცრად ჩაერევიან, თუ აქცია ვანდალიზმში გადაიზრდება“, – განაცხადა საფრანგეთის შს მინისტრმა.

ამასთან, მედიის ცნობით, საფრანგეთის მასშტაბით არსებული 3 700 საშუალო სკოლიდან 891-ში სასწავლო პროცესი მთლიანად შეჩერებულია, კიდევ დაახლოებით 900-ში კი – ნაწილობრივ ან თითქმის სრულიად.