საფრანგეთი ევროპაში შესაძლო ომისთვის საავადმყოფოებს ამზადებს - კლინიკები 2026 წლის მარტისთვის მზად უნდა იყვნენ - Le Figaro

საფრანგეთის ჯანდაცვის სამინისტროს ინსტრუქციის თანახმად, საფრანგეთის საავადმყოფოები 2026 წლის მარტისთვის ევროპაში შესაძლო ომისთვის მზად უნდა იყვნენ, რათა ათასობით დაჭრილი ჯარისკაცის მიღება შეძლონ, - ინფორმაციას Le Figaro ავრცელებს.

გაზეთ Le Canard Enchaîné-ში გამოქვეყნებული ინფორმაციის თანახმად, საფრანგეთის ჯანდაცვის სამინისტროს ბოლოდროინდელი ინსტრუქციები სხვადასხვა რეგიონულ ჯანდაცვის ორგანოებს ავალებს, მოემზადონ საფრანგეთთან შესაძლო "დიდი (სამხედრო) შეტაკებისთვის" 2026 წლის მარტისთვის.

დოკუმენტის თანახმად, რომელიც 2025 წლის 18 ივლისით არის დათარიღებული, საფრანგეთი შესაძლოა უახლოეს თვეებში ფართომასშტაბიანი კონფლიქტის "უკანა ბაზად" იქცეს. ამიტომ, ის მზად უნდა იყოს ასობით ათასი დაჭრილი ფრანგი და უცხოელი ჯარისკაცის მისაღებად. ჯანდაცვის სამინისტრო განიხილავს პორტებისა და აეროპორტების მახლობლად სამედიცინო ცენტრების შექმნის შესაძლებლობას ჯარისკაცების "სახლში გადამისამართების" მიზნით.

საავადმყოფოებში 10 000-დან 50 000-მდე ადამიანის 10-დან 180 დღემდე დარჩენას ვარაუდობენ. "არსებულ საერთაშორისო ვითარებაში, აუცილებელია მაღალი ინტენსივობის კონფლიქტებში სამედიცინო დახმარების გაწევის გზების წინასწარ განსაზღვრა", - განმარტავს ჯანდაცვის სამინისტრო დოკუმენტში.

BFMTV არხზე, აღნიშნულ საკითხთან დაკავშირებით კითხვაზე, ჯანდაცვის მინისტრმა, კატრინ ვოტრენმა, ასეთი ინსტრუქციის არსებობა არ უარყო. "საავადმყოფოები მუდმივად ემზადებიან ეპიდემიებისთვის, პაციენტების მისაღებად (...) ქვეყნისთვის სრულიად ნორმალურია კრიზისების და მიმდინარე მოვლენების შედეგების წინასწარ განჭვრეტა. ეს ცენტრალური ხელისუფლების პასუხისმგებლობის ნაწილია", - თქვა მან.