„მგონი ჩვენი შვილი მოვკალი...“ - ფლორიდაში, დედას 3 თვის ჩვილის, ბრილიანტის ბეჭდით, სასიკვდილოდ ცემას ედავებიან

ფლორიდაში 42 წლის ქალი საკუთარი 3 თვის შვილის გარდაცვალების საქმეზე დააკავეს. პოლიციის ინფორმაციით, ქალი ჩვილს თავში მუშტს ურტყამდა, რა დროსაც თითზე გაკეთებულმა დიდი ზომის, ბრილიანტისთვლიანმა ბეჭედმა ბავშვის თავის არეში მძიმე დაზიანებები გამოიწვია.

ფლორიდის შტატში, ქალაქ ლეიკლენდში, 42 წლის ჯესიკა ვლასაკი 3 თვის შვილის გარდაცვალების საქმეზე დააკავეს. მას ბავშვის მიმართ დამამძიმებელ გარემოებებში ჩადენილ ძალადობას ედავებიან.

პოლკის ოლქის შერიფის ოფისის ინფორმაციით, შემთხვევა 6 სექტემბრის ღამით მოხდა. დაახლოებით შუაღამემდე ცოტა ხნით ადრე სამართალდამცველები ლეიკლენდში, ერთ-ერთ საცხოვრებელ სახლში, უგონო მდგომარეობაში მყოფი ჩვილის შესახებ შეტყობინების გამო მივიდნენ.

ბავშვი სასწრაფო დახმარების ჯგუფმა საავადმყოფოში გადაიყვანა, თუმცა ექიმებმა მისი გადარჩენა ვეღარ შეძლეს და გარდაცვალება დაადასტურეს.

თავდაპირველად ბავშვის თავზე ექიმებმა ნაკაწრი და სისხლჩაქცევები შენიშნეს.

პოლიციის ცნობით, ვლასაკმა სამართალდამცველებს უთხრა: „ვფიქრობ, ჩვენი შვილი მოვკალი.“
თუმცა ქალი ამტკიცებდა, რომ ბავშვისთვის განზრახ არ დაურტყამს.

მისი განცხადებით, ჩვილთან ერთად შემთხვევით ჩაეძინა. როცა გაიღვიძა, ბავშვი საწოლზე პირქვე დაწოლილი, უძრავი და შეხებისას ცივი დახვდა.

თუმცა მოგვიანებით ჩატარებულმა სასამართლო-სამედიცინო ექსპერტიზამ შემთხვევის შესახებ სრულიად სხვა სურათი წარმოაჩინა.

ექსპერტიზამ ბავშვის თავზე სამი დაზიანება გამოავლინა
სასამართლო-სამედიცინო ექსპერტიზის თანახმად, ბავშვის თავზე სულ სამი ცალკეული დარტყმით მიყენებული დაზიანება იყო.

ერთ-ერთი დაზიანება შუბლზე მდებარეობდა და მისი ფორმა კვადრატის მსგავსი იყო. გამომძიებლების ყურადღება სწორედ ამ დეტალმა მიიქცია.

საქმეზე მომუშავე სამართალდამცველებმა ვლასაკს დიდი ზომის, ბრილიანტის მსგავსი ქვის მქონე ბეჭედი შენიშნეს.

პოლიციის განცხადებით, ბეჭდის ქვის ფორმა იმ კვადრატის მსგავსი დაზიანების ფორმას ემთხვეოდა, რომელიც ექსპერტიზამ ბავშვის შუბლზე დააფიქსირა.

მოგვიანებით სასამართლო-სამედიცინო ექსპერტმა დაადასტურა, რომ ბავშვის თავზე არსებული დარტყმითი დაზიანებები სწორედ ამ ბეჭდით იყო მიყენებული.

როდესაც სამართალდამცველებმა ბეჭედი ნივთმტკიცებად ჩამოართვეს, ქალმა მათ ჰკითხა, იყო თუ არა სწორედ ეს ბეჭედი ის ნივთი, რომელმაც მისი შვილი მოკლა.

გამომძიებლებმა დაკითხეს ის ადამიანებიც, რომლებიც იმ დროს სახლში იმყოფებოდნენ.

მათი ჩვენებების თანახმად, როდესაც ჩვილი უგონო მდგომარეობაში აღმოჩნდა, ვლასაკი ბავშვის ოთახში მარტო იმყოფებოდა.

სახლში მყოფებმა მანამდე ბავშვის ოთახიდან ყვირილის ხმა გაიგეს.

ჩვილის მამამ სამართალდამცველებს უთხრა, რომ ვლასაკი ალკოჰოლის მიღების შემდეგ აგრესიული ხდებოდა.

მისივე თქმით, ქალმა უთხრა, რომ შემთხვევის დღეს, დაახლოებით შუადღისას, ალკოჰოლი შეიძინა.

პოლიციის ცნობით, მოგვიანებით, იმავე ღამეს, ვლასაკმა ბავშვის მამას რამდენიმე შეტყობინება გაუგზავნა და წერდა, რომ ჩვილი მოკლა და ის გარდაცვლილი იყო.

გამომძიებლების ინფორმაციით, ქალმა გარკვეული შეტყობინებები მოგვიანებით წაშალა.

საქმეში კიდევ ერთი გარემოება გახდა საყურადღებო.

პოლიციის ინფორმაციით, შვილის გარდაცვალებიდან რამდენიმე დღის შემდეგ ვლასაკმა ბავშვის მამას დაურეკა.

მამამ გამომძიებლებს უთხრა, რომ საუბრისას ქალი უჩვეულოდ მშვიდი და ნორმალური ჩანდა, თითქოს რამდენიმე დღის წინ მომხდარი ტრაგედია არ არსებობდა.

ჯესიკა ვლასაკი სამართალდამცველებმა ხუთშაბათს დააკავეს.

ის ამჟამად პოლკის ოლქის ციხეში იმყოფება და გირაოს გარეშეა დაკავებული.

მის საქმეზე წინასასამართლო სხდომა ხუთშაბათს არის დაგეგმილი, ხოლო სასამართლოში ბრალის ოფიციალური წარდგენა 13 ოქტომბერს უნდა გაიმართოს.

გამოძიება გრძელდება. - წერს უცხოური მედია