მედიის ცნობით, თურქეთი სირიაში ტიიასის საჰაერო ბაზის კონტროლს იწყებს და საჰაერო თავდაცვის სისტემების განთავსებას გეგმავს

თურქეთი სირიაში ტიიასის საჰაერო ბაზის კონტროლს იწყებს და საჰაერო თავდაცვის სისტემების განთავსებას გეგმავს, – ამის შესახებ ინფორმაციას „მიდლ ისთ აი“ ავრცელებს.

გავრცელებული ცნობით, „ტე4“-ის სახელით ცნობილ ბაზაზე სამშენებლო გეგმები შემუშავების პროცესშია.

ანკარა და დამასკო შეთანხმებული არიან თავდაცვის პაქტზე გასული წლის დეკემბრიდან, მას შემდეგ, რაც სირიაში ბაშარ ასადის რეჟიმი დასრულდა. შეთანხმება ითვალისწინებს, რომ თურქეთი უზრუნველყოფს სირიის საჰაერო დაფარვას.

„მიდლ ისთ აი“-ს სტატიის თანახმად, ანკარა მიზნად ისახავს სირიის სტაბილიზაციას თავისი სამხედრო შესაძლებლობების გამოყენებით და ძალაუფლების ვაკუუმის შევსებით, რომელიც დარჩა რუსეთისა და ირანის გასვლით.

„ტე4“-ის ავიაბაზა სირიის ცენტრალურ ნაწილში, პალმირას მახლობლად მდებარეობს. გავრცელებული ინფორმაციით, თურქეთი ასევე გეგმავს სადაზვერვო და შეიარაღებული უპილოტო აპარატების განთავსებას. სირიის სამხედრო ინფრასტრუქტურა ისრაელის სამხედრო ავიაციის თავდასხმის ობიექტი ხშირად ხდება.

გასულ კვირაში, ისრაელის სამხედრო ავიაციამ „ტე4“-ის და პალმირას ავიაბაზას დაარტყა. გამოცემის თანახმად, ისრაელში მიიჩნევენ, რომ სირიაში თურქული საჰაერო ბაზა ძირს უთხრის ისრაელის მოქმედების თავისუფლებას.