ლიეტუვის პარლამენტის სპიკერი: ლიეტუვასა და ტაივანს შორის თანამშრომლობის მოლოდინები არ გამართლდა - ჩინეთთან ურთიერთობების ნორმალიზება მთავრობის დღის წესრიგში დგას

ლიეტუვის პარლამენტის სპიკერი, საულიუს სკვერნიალისი აცხადებს, რომ ლიეტუვასა და ტაივანს შორის თანამშრომლობის მოლოდინები არ გამართლდა. ინფორმაციას ამის შესახებ ადგილობრივი მედია ავრცელებს.

სკვერნიალისი დაეთანხმა ქვეყნის პრემიერ-მინისტრ გინტაუტას პალუცკას აზრს, რომ ტაივანთან თანამშრომლობის მოლოდინები გადაჭარბებული იყო.

„ზოგიერთი კოლეგის, უფრო დიდი ოპტიმიზმით განწყობილი პოლიტიკოსების განცხადებების თანახმად, ჩვენ უკვე მიკროსქემების მწარმოებელი სადღაც ხუთი ქარხანა უნდა გვქონოდა ლიეტუვაში. [...] ჩვენ ამას ვერაფერს ვხედავთ“, - აღნიშნა ლიეტუვის პარლამენტის სპიკერმა.

სპიკერმა ასევე განაცხადა, რომ „არ სურს ტაივანით იმედგაცრუება“, მაგრამ კუნძულთან ურთიერთობებში „გადაჭარბებული ოპტიმიზმი“ იყო მცდელობა „დაეფარათ ავანტიურიზმი საგარეო პოლიტიკაში, როდესაც გაიხსნა ტაივანის წარმომადგენლობა, რომელსაც ისე დაარქვეს, როგორც არ უნდა რქმეოდა“.

სკვერნიალისის თქმით, ჩინეთთან ურთიერთობების ნორმალიზება მთავრობის დღის წესრიგში დგას.

„პროცესები, რა თქმა უნდა, საჯაროდ არ განიხილება, მაგრამ, სავარაუდოდ, ეს პროცესი ამა თუ იმ ფორმით მიმდინარეობს“, - დასძინა მან.

ლიეტუვასა და ჩინეთის ურთიერთობები გაუარესდა 2021 წელს მას შემდეგ, რაც ვილნიუსმა ტაივანს წარმომადგენლობის გახსნა შესთავაზა. პეკინმა ეს „ერთი ჩინეთის“ პოლიტიკის დარღვევად შეაფასა.