ლას-ვეგასში, ტრამპის კუთვნილ სასტუმროსთან Tesla-ს Cybertruck-ი აფეთქდა - დაიღუპა ერთი ადამიანი

ლას-ვეგასში, დონალდ ტრამპის სასტუმროსთან Tesla-ს Cybertruck-ი აფეთქდა. დაიღუპა  მძღოლი, რამდენიმე ადამიანმა მსუბუქი დაზიანებები მიიღო. ინფორმაციას BBC-ი ავრცელებს.

ადგილობრივი პოლიციის ინფორმაციით, მანქანა კოლორადოში დაიქირავეს და ლას-ვეგასში აფეთქებამდე ორი საათით ადრე ჩავიდა. აფეთქების დროს ის სასტუმროს შესასვლელთან იდგა.

როგორც პრესკონფერენციაზე შერიფმა კევინ მაკმაჰილმა აღნიშნა, აფეთქების ადგილის დათვალიერების შემდეგ აღმოჩნდა, რომ იქ საწვავის რამდენიმე კასრი და დიდი რაოდენობით ფეიერვერკი იდო.

ამასთან, ხანძარი გაჩნდა დაახლოებით 08:40 საათზე, რამდენიმე საათის შემდეგ, რაც ნიუ ორლეანში, "ისლამური სახელმწიფოს" დროშით ხელში, მამაკაცი სატვირთო მანქანით ბრბოში შეიჭრა და სულ მცირე 15 ადამიანი მოკლა.

ლას-ვეგასის პოლიციის დეპარტამენტი იკვლევს, შეიძლება თუ არა ეს ორი ინციდენტი ერთმანეთთან კავშირში იყოს. ასევე იძიებენ, შეიძლება თუ არა ეს აფეთქება უკავშირდებოდეს არჩეულ პრეზიდენტ დონალდ ტრამპს, რომელსაც სასტუმრო ეკუთვნის, ან Tesla-ს მფლობელ ილონ მასკს.

გამოძიების ფედერალური ბიუროს განცხადებით, მუშაობენ იმის გასარკვევად, იყო თუ არა მომხდარი ტერორისტული აქტი.