ლაბორატორიული ინციდენტი თუ უბრალო დამთხვევა?! - რას ამბობენ ექსპერტები ირკუტსკში მომხდარ შემთხვევაზე

ლაბორატორიული ინციდენტი თუ უბრალო დამთხვევა? რას ამბობენ ექსპერტები ირკუტსკში მომხდარ შემთხვევაზე
 რუსეთის ირკუტსკის ჭირის საწინააღმდეგო კვლევითი ინსტიტუტის თანამშრომლის გარდაცვალებამ საზოგადოებაში ლაბორატორიული ინციდენტისა და შავი ჭირის ბაქტერიის (Yersinia pestis) შესაძლო გაჟონვის შესახებ სპეკულაციები ააგორა.

ოფიციალური მოსკოვი კავშირს უარყოფს და მიზეზად უცნობი წარმოშობის პნევმონიას ასახელებს. საერთაშორისო ექსპერტები გამოცემა ScienceAlert-თან საუბრისას განმარტავენ, თუ რასთან შეიძლება გვქონდეს საქმე.

რა უნდა ვიცოდეთ რეალურად?

რატომ იწვევს შიშს შავი ჭირი? ჭირის ფილტვის (პნევმონიური) ფორმა უკიდურესად სწრაფი და აგრესიულია. პროფესორ ბრენდან ვრენის თქმით, მკურნალობის გარეშე ის შესაძლოა 24 საათში გახდეს ფატალური, თუმცა ადრეულ ეტაპზე ანტიბიოტიკები ეფექტიანია.
 

მრავალშრიანი დაცვა: ბირმინგემის უნივერსიტეტის ვირუსოლოგ ზანია სტამატაკის განმარტებით, მაღალი დაცვის ლაბორატორიაში მხოლოდ სინჯარის გატეხა გაჟონვას არ ნიშნავს. ცოცხალ პათოგენებთან მუშაობა სპეციალურ ჰერმეტულ კაბინეტებში, უარყოფითი წნევის ოთახებსა და ჰეპა-ფილტრების პირობებში მიმდინარეობს.
 

გენომური მტკიცებულება: ექსპერტთა თქმით, ინციდენტის დადასტურებისთვის აუცილებელია პაციენტისგან იზოლირებული შტამის გენომური სეკვენირება და მისი შედარება ლაბორატორიაში შენახულ ნიმუშებთან. ამის გარეშე საქმე გვაქვს მხოლოდ დროში დამთხვევასთან.

200 კონტაქტი: ხელისუფლების მიერ 200-მდე ადამიანის მონიტორინგი სტანდარტული პრევენციული პროტოკოლია და არა ინფიცირებულთა რეალური რაოდენობა.
მეცნიერები ხაზს უსვამენ, რომ შავი ჭირის ფილტვის ფორმა რესპირატორული წვეთების გზით გადადის, თუმცა ის არ არის ისეთი მაღალგადამდები, როგორც, მაგალითად, SARS-ის ტიპის რესპირატორული ვირუსები.